Xabaringiz bor, kecha Qozog'istonning "Qayrat" jamoasi Bosniya va Gercogovinaning "Borac" klubiga qarshi maydonga chiqdi. Uchrashuvni kuzatish uchun arenaga bir qancha mehmonlar, futbol murabbiylari, OAVlar tashrif buyurishdi. Ularning orasida Vladikavkazning "Alaniya" klubi bosh murabbiyi Spartak Gogniev ham borligi etiborimizni tortdi. futbolchilik faoliyatida shu jamoada to'p tepgan rossiyalik mutaxassis ayni paytda boshchilik rolini bajarmoqda.
- Spartak Arturovich sizni uchratganimizdan shodmiz. Etibor berib qaradik uchrashuvni diqqat bilan kuzatdingiz. O'yin surati qanday taassurot qoldirdi?
- Ko'rinib turibdi, jamoalar mashg'ulotlarda og'ir yuklamalar olishgan. "Qayrat"ning raqibi tarkibida baquvvat, jismoniy tomondan o'ta baquvvat futbolchilar bor. Birinchi taym menga yoqdi. Ikkinchi bo'limda "Qayrat" o'ziga keldi va gol urdi.
- Sinchkovlik bilan ko'rib o'tirganingizni hisobga olganda balki qaysidir futbolchi etiboringizni tortgandir?
- "Qayrat" safidagi himoyachining harakatlari chakki emas. O'yinni o'ziga olishga harakat qilmoqda. Umuman olganda yaxshi o'yin ko'rdik.
- Bugungi kunda "Qayrat" azosiga aylangan o'zbekistonlik Jasur Jaloliddinovga "Alaniya" klubi jiddiy qiziqish bildirgan ekan. Mutaxassis sifatida unda qanday sifatlarni ko'rdingiz?
- Jasurga qiziqdik. Futbolchi ajoyib texnikaga ega. Tezlik, tez qaror qabul qilish, paslar barchasi jamuljam. SHunday bo'ldiki, uni qo'lga kirita olmadik.
- Qaysidir manoda Qozog'iston klubiga o'tgani to'g'ri qaror bo'lishi mumkin, deb o'ylaymiz. CHunki u legioner sifatida ilk bor Moskvaning "Lokomotiv" klubiga borganda juda qiyinchiliklarga duch keldi...
- "Lokomotiv" Rossiyaning top jamoasi. Kuchli futbolchilar yig'ilgan klubda raqobat ham shunga yarasha. Menimcha hamma ko'rdi, Jasur uchun jismoniy taraflama qiyin bo'ldi. Moskvaliklar tarkibiga kelib darhol o'ynab ketish oson emas. Jamoa esa uni formaga kirib olishini kutmaydi. Jasurga omad tilayman.
- Yaqqol sezilyaptiki, o'zbekistonlik futbolchilar haqida etarli malumotlarga egasiz. Sizdan yana bir futbolchimiz Ibrohimhalil Yo'ldoshev haqida so'ramoqchimiz. "Nijniy Novgorod" uning uchun qanchalik tramplin bo'la oladi?
- Qanot himoyachisi Ibrohimhalil Yo'ldoshevga og'iz solib ko'rgan edik. Ammo ayni pallada u boshqa jamoada. Ushbu futbolchi ko'proq hujumkor uslubga moslashgan. Oldingi chiziqda imkoniyatlari keng. "Nijniy Novgorod"da esa yopiq, himoyaviy o'yin yo'lga qo'yilgan. Mening fikrimcha bor imkoniyatini ko'rsata olmaydi. Rossiya orqali Italiyaga ketgan Eldor SHomurodovda hujumchiga hos barcha sifatlar bor. Bunday hujumchilar juda kam. "Romada" zaxirada qolayotganini bir tomondan to'g'ri tushunish kerak. U oddiy jamoada o'ynayotgani yo'q. Futbolchi gohida zaxirada qoladi. Umid qilamanki Eldor moslashuv jarayonidan to'g'ri o'tib oladi. Uning kelajagi hali oldinda.
- Vladikavkaz, "Alaniya" haqida gap borar ekan Mirjalol Qosimovni eslamasdan ilojimiz yo'q. Valeriy Gazzaev qo'l ostida u ajoyib o'yinlari bilan mahalliy muxlislar mehrini qozona oldi. Qosimov vladikavkazliklar uchun qanday shaxs hisoblanadi?
- Mirjalol Qosimovni Vladikavkazda hali ham eslab turishadi. U bizning kumirimiz edi. Faqat ijobiy fikrlar bildirishim mumkin. U to'p tepgan paytda men yosh bola edim. O'yinlarini, standartlardagi qoyilmaqom ijro, maydon markazidagi o'tkir paslar ochig'i so'z bilan tariflash qiyin. U hozir murabbiylik qilmoqda. Qosimov bilan o'tgan yili Turkiyadagi yig'in paytida ko'rishdik. Saytingiz orqali o'zimni salomimni yo'llamoqchiman.
Bosh sahifaga
323