Ushbu bahsdan so'ng "Qayrat" bosh murabbiyi Qurbon Berdievning yordamchisi Dmitriy Kirichenko championat.asia saytiga intervyu berdi. Malumot uchun, Kirichenko Evro-2004da Greciya terma jamoasi darvozasiga 67-soniyada gol urgan va o'sha gol Evropa chempionatlari tarixidagi eng tezkor gol bo'lib turibdi.
- Ko'ryapmizki, jamoa tarkibi ancha yoshardi. Davom etayotgan yig'in va o'rtoqlik o'yinidagi raqib xususida fikr bildirsangiz...
- O'z chempionatida 3-o'rinda borayotgan kuchli jamoaga qarshi o'ynadik. Bu bizning birinchi nazorat uchrashuvimiz edi. Bungacha yaqin orada o'rtoqlik o'yinlarida qatnashmagandik, chunki yig'in boshlanish muddati ozroq cho'zilib ketdi. Albatta, mag'lub bo'lish yoqimsiz, lekin birinchi bahsda oson bo'lmasligini bilardik.
- Jamoaning bu darajada yoshartirilishi jamoa yuqori o'rinlar uchun kurashishida xalaqit qilmaydimi?
- Yo'q. O'ylaymanki, tarkibimiz yosh bo'lsa-da, juda iqtidorli futbolchilardan iborat.
- Jamoada qiziqarli "trio" barpo bo'ldi – Guljigit Alikulov ("Qirg'izistonlik Messi"), Erkebulan Seydaxmet ("Qozog'istonlik Messi") va Jasur Jaloliddinov ("O'zbekistonlik Messi"). Bu holatni qanday baholaysiz? Ular o'zaro chiqishib ketishadimi?
- Ayni paytda tarkibimizda yosh, lekin shu bilan birga, juda iqtidorli yigitlar jam bo'lishdi. O'yinchilar bu iqtidorni namoyish etishlari o'zlariga va albatta murabbiylarga bog'liq. Ularda xohish kuchli, qilinayotgan mehnat uchun rahmat aytishimiz kerak. Hozir oson emas, ammo hammasi yaxshi bo'ladi va sekin-asta Messining darajasiga chiqishadi (kuladi).
- Norasmiy debyutini o'tkazgan Jasur Jaloliddinov haqida qanday fikrlaringiz...
- Jasur o'sishi lozim bo'lgan iqtidor egasi. U Rossiyaga bordi, ammo o'zini ko'rsatish nasib qilmadi. Uning o'yinlarini ko'rganman. Hali barchasi oldinda, astoydil mehnat qilib, rivojlanish kerak.
Bosh sahifaga
371