Saydullo Rahmatov: "Turkiyadagi o'rtoqlik o'yinlarida natija emas, tajriba muhim"

Kecha jamoaning mashg'ulotiga tashrif buyurgan saytimiz muxbirlari samarqandliklar futbolchisi Saydullo Rahmatovning fikrlarini oldi. 

- "Neftchi" bilan Superligaga chiqdingiz. Farg'onaliklar sizga yangi shartnoma taklif qilishdimi yoki ketish qarori o'zingizdan chiqdimi? 

- Avvalo "Neftchi"ni Superligaga qaytgani bilan tabriklayman. Buni o'zimni hissamni qo'shgan bo'lsam xursandman. Farg'ona futboli tarbiyalanuvchisi sifatida bu men uchun faxrli ish, deb bilaman, 

- "Dinamo"ning chorlovi qaysi tomonlama qiziq bo'ldi?

- Klubga viloyat hokimi va homiylarning qiziqishi baland va yangicha qarashlarga ega. Ularda jamoaning infratuzilmasini yaxshilash rejasi bor. Ochig'i "Dinamo" taklifi kutilmaganda bo'ldi. Bu jamoa Superligaga chiqmadi, balki qaytdi. 

- "Dinamo" bilan bir yillik shartnoma imzoladingiz. Nima uchun ko'p yillik emas? Umuman olganda bunday shartnomalarga munosabatingiz qanday?

- Bir yillik shartnoma tuzdik. Boisi klub tomonidan shunday muddat berildi. Fikrimcha, o'zbek futbolida bir yillik shartnomani normal holat sifatida qabul qilish mumkin. Ko'p yillik kelishuvlar asta-sekin rivojlanyapti. Agarda Evropa bilan taqqoslaydigan bo'lsak, uzoq vaqtli shartnomalarda bandlari ham shunday bo'lishi kerak. 

- Turkiyada olib borilayotgan o'quv-mashg'ulot yig'inlari, o'rtoqlik uchrashuvlaridan jamoa nima olyapti?

- Xorijda yig'in o'tkazish har bir jamoaga foydali bo'ladi. Bu erda sifatli maydonlar, Evropa klublari bilan o'rtoqlik o'yinlarida muammolar yo'q. Mazkur o'yinlarda yutish yoki yutqazish, natija emas, tajriba olishimiz muhim.