Yan Oblak va Ederson
Ayni paytda dunyoning top-darvozabonlaridan bo'lgan bu ikki futbolchi 2012/13 yilgi mavsumda Portugaliyaning o'rtamiyona jamoasi "Riu-Ave" klubida birga faoliyat olib borgan. Sloveniyalik darvozabon o'sha mavsumda asosiy kiper sifatida tanlandi va 31 o'yin o'tkazdi. Bir mavsumdan keyin u "Benfika"ga qaytdi va Ederson uning o'rnini egalladi. Bir necha yillardan keyin ular eng top-darajada o'yin ko'rsatib, kuchli jamoalar tarkibiga qo'shilishdi.
Devid Bekxem va Devid Moyes
1994/95 yilda "Preston" klubi yosh yulduz Devid Bekxemni ijara asosida tarkibga qo'shib oldi va bu klubda yuqori formadagi Devid Moyes ham faoliyat olib borardi. Bekxem jamoada atigi 5 ta o'yinda maydonga tushgan va 1 ta golni o'z hisobiga yozib qo'ygan. Bekxem intervyularidan birida bir yillik ijara muddati davomida Moyesdan ko'p narsa o'rganganini va buni hech qachon unutmasligini aytib o'tgan edi.
Rivaldo va Kazemiro
2011 yilda Rivaldo faoliyatidagi katta sayohatdan so'ng "San-Paulu" klubiga qaytdi. Afsona haqiqatan ham katta hurmat va etibor bilan kutib olindi hamda unga butunlay erkinlik taqdim etildi. 30 o'yinda 5 ta gol urishga muvaffaq bo'ldi. Ayni shu paytda professional faoliyatidagi ikkinchi mavsumini o'tkazayotgan Kazemiro ham jamoaning asosiy o'yinchilaridan edi. Bir yildan so'ng u "qirollik klubi" etiboriga tushdi va klub bilan xayrlashdi.
Edgar Davids va Uilfrid Zaxa
Davids 2010 yilda "Kristal Pelas" bilan qisqa muddatli shartnoma imzoladi. Yarim himoyachi "Pelas" uchun atigi 6 o'yinda ishtirok etdi. Uilfrid ham shu mavsumda o'zining katta faoliyatidagi ilk qadamini qo'ygandi. Birinchi mavsumidayoq u barcha turnirlarda 44 o'yin o'tkazdi. Davids esa o'sha mavsumdan keyin klub bilan shartnomasini bekor qilgan.
Maurisio Pochettino va Ronaldino
"Espanol"dagi yorqin o'yinlaridan keyin PSJ argentinalik futbolchini jamoaga olib keladi. Pochettino poytaxt jamoasida ikki mavsum (2001/2003 yillar oralig'i) o'tkazib, 95 o'yinda maydonga tushdi. Braziliyalik afsungar ham ayni shu mavsumlar davomida Parij klubi safida harakat qilgan. Pochettino va Ronaldino birgalikda yaxshi natijalar qayd etgan. Keyinroq "Barselona" yuqori darajada o'yin namoyish qilgan Ronaldinoni tarkibga jalb qilgan.
Patrik Klyuyvert, Eden Azar va Per-Emerik Obameyang
Afsonaviy Patrik Klyuyvert 2007/08 yilgi mavsumda "Lill" klubida Eden Azar bilan jamoadosh bo'lgan. 31 yoshli niderlandiyalik futbolchi Liga 1 da 9 o'yin o'tkazdi. SHu mavsum Klyuvert uchun so'nggisi edi. Azar esa klubda yana 4 yil to'p tepdi. 2009/10 yilgi mavsumda jamoaga "Milan"dan ijara asosida Per-Emerik Obemeyang ham qo'shildi. Gabonlik futbolchi klubda 24 o'yin o'tkazdi.
Maradona va Diego Simeone
"Sevilya" klubi 1992/93 yilgi mavsumda Maradonani klubga taklif qilgan. Buni qarangki, afsonaning futbolchilik faoliyatidagi so'nggi mavsumlari Simeonening ilk mavsumlariga to'g'ri keladi. "Atletiko" ustozi interyulardan birida kiyinish xonasida afsonani ko'rib, hayajondan o'zini yo'qotib qo'yganini aytib bergan.
SHuhrat Homidov tayyorladi
Bosh sahifaga
108
