Gap yoshlar va o'smirlar o'rtasidagi Osiyo chempionatlari haqida ketyapti. 24 dekabrda FIFA 2021 yilgi U-20 hamda U-17 jahon chempionatlarini o'tkazmasligini rasman malum qildi.
U-20 jahon chempionati 2021 yil Indoneziyada, U-17 jahon chempionati Peruda bo'lib o'tishi belgilab qo'yilgandi. Biroq koronavirus pandemiyasi tufayli jahon futbol tashkiloti mezbonlik huquqini saqlab qolgan holda har ikki musobaqani 2023 yilgacha bekor qilishni lozim topdi.
SHundan so'ng o'z-o'zidan OFK ham U-16 va U-19 Osiyo chempionatlarini 2023 yilgacha qoldirishi haqida gap-so'z chiqdi. Albatta, bu gaplar bejiz emas. CHunki har ikki musobaqa yoshlar va o'smirlar o'rtasidagi jahon chempionatiga yo'llanma beradi.
Katta ehtimol bilan OFK tez orada bu ikki musobaqa rasman qoldirilganini elon qiladi. SHuningdek, plyaj futboli va futzal bo'yicha Osiyo chempionatlari ham qoldirilgani haqida xabar chiqib qolsa ajab emas. Plyaj futboli bo'yicha Osiyo chempionati bu yil Tailandda, futzal bo'yicha Osiyo chempionatini Quvaytda o'tkazish belgilab qo'yilgan.
Hozirda U-16 va U-19 Osiyo chempionatlari bilan birgalikda plyaj futboli bilan futzal bo'yicha qita birinchiligi ham bu yil o'tkazilmasligi internet tarmoqlarida ko'p muhokama qilinmoqda. Ammo OFK bu borada malumot berganicha yo'q. Lekin shamol bo'lmasa, daraxtning uchi qimirlamaydi deganlaridek, tez orada rasmiy xabar chiqib qolsa kerak.
U-16 Osiyo chempionati
Musobaqa mezboni: Bahrayn
Belgilangan muddat: 31 mart - 17 aprel, 2021.
FIFA U-17 jahon chempionatini bekor qilganidan so'ng U-16 Osiyo chempionatini o'tkazishga hojat qolmaydi. O'zbekiston o'smirlar terma jamoasi Olim SHokirov boshchiligida mazkur musobaqaga hozirlik ko'rayotganidan xabaringiz bor. Va bu hozirlik toki rasmiy malumot chiqmaguncha davom etadi.
U-19 Osiyo chempionati
Musobaqa mezboni: O'zbekiston
Belgilangan muddat: 3-20 mart, 2021.
Yurtimizda o'tishi kerak bo'lgan bu turnir ham mart oyida o'tkazilmaydi. Musobaqa shu bilan 2023 yil bo'lib o'tadi va mezbonlik huquqi O'zbekistonda saqlanib qoladi.
Futzal bo'yicha Osiyo chempionati
Musobaqa mezboni: Quvayt
Belgilangan muddat: 23 mart - 3 aprel, 2021.
Jahon chempionatiga yo'llanma beruvchi mazkur musobaqa ham katta ehtimol bilan o'tkazilmaydi. Hozircha FIFA 2021 yilning kuzida Litvada bo'lib o'tishi kerak bo'lgan futzal bo'yicha jahon chempionatini bekor qilgani yo'q. Agar jahon futboli tashkiloti shunday qarorga kelsa, o'z-o'zidan OFK ham FIFA izidan boradi.
Plyaj futboli bo'yicha Osiyo chempionati
Musobaqa mezboni: Tailand
Belgilangan muddat: 28 aprel - 8 may, 2021.
Plyaj futboli bo'yicha qita birinchiligini Tailandda o'tkazish ko'zda tutilgan va bunda 16ta jamoa ishtirok etishi belgilab qo'yilgan. Lekin ishtirokchilar nomi to'liq malum emas. Agar musobaqa qoldiriladigan bo'lsa, buni bilishga hojat ham qolmaydi.
Bosh sahifaga
221