Barchada kayfiyat yuqori. Muxlis ham mutaxassislar musobaqadagi raqiblarimizni "g'ajib tashlaydigan" ishtahada. Murabbiy esa o'rtoqlik uchrashuvlarida hech qachon natijani birinchi darajaga qo'ymasligini takidladi. Barchaning qulog'iga yoqadigan, shu bilan birga, ehtimoliy yomon natijalar uchun o'ziga xos "fortochka" vazifasini bajaradigan gap...
Biroq, ko'pchilik etibor qilmayotgan bir jihat bor. Agar oldingi bahslarga tanlangan tarkiblarga qarasangiz, "payshanbaning gapi jumaga to'g'ri kelmayotgani" ko'rinadi. Katanec beshshala o'yinda ham faqat asosiy "zambaragi" (Eldor)ni ilk daqiqalardan maydonga chiqardi. Uning o'rniga hech qanday eksperiment sinovdan o'tkazilmagan.
Sloveniyalik mutaxassis bugun o'tgan yilning avgust oyida aytgan ("O'rtoqlik o'yinlari tugul, mashg'ulotlarda ham g'olib bo'lishga harakat qilaman") fikrini rad qilgani rost. Ammo, kulminaciya bu emas. Anjuman davomida quyidagicha savol berildi:
- Terma jamoaga 4 nafar hujumchi chaqirilgan va ularning hammasi legioner. Ertaga o'z klubida to'liq o'ynayotgan forvardlar maydonga tushadimi yoki SHomurodov o'ynaydimi?
Mister Srechkoning javobi ko'pchilikni hayratlantirgan bo'lsa kerak: "Yo'q-yo'q, SHoma o'ynaydi. U sardor".
Keling, yuqoridagi savol-javobni umumlashtirib, tagidagi manoga etibor qaratamiz: "Yo'q-yo'q! Aziz va SHerzod Eronda muntazam o'ynab turgan, Igor Qozog'iston chempionatini zabt etgan bo'lsa ham, Eldor o'ynaydi. CHunki u sardor (aniqrog'i, "Roma" futbolchisi)".
Demak, SHomurodov Katanecning qatorasiga 6-o'rtoqlik o'yinida ham boshlang'ich tarkibda tushadi ("Al Vahda" bilan nazorat uchrashuvi hisob emas). Malumot uchun, surxondaryolik hujumchi so'nggi 1 oy ichida atigi 35 daqiqa o'yin amaliyotiga ega bo'lgan. SHunga qaramasdan, u asosiyda. Qozog'istonda eng yaxshilardan bo'lib turgan Sergeevga esa 45 daqiqa ham ravo ko'rilmayapti. Bu nimani anglatadi? Terma jamoa libosini yaxshi formada bo'lganlar kiyishi kerakmi yoki "sardor"lar? Katanec uchun Eldor raqobatdan tashqaridami?
Bu savollar yana bir muddat ochiq turadi. Lekin, murabbiy nayzaning uchi sifatida faqat Eldorga ishonch bildirishi, o'yin uning atrofida qurilayotgani juda xavotirli holat. CHunki rasmiy o'yinlarda istalgan raqib "Roma" forvardini "yopish"ga harakat qiladi. Va buni uddalasa, butun jamoamizni "bo'g'ib" qo'yishi mumkin.
SHuningdek, sloveniyalik murabbiyning Eldor SHomurodov borasidagi qarorlari eski xotiralarni qo'zg'ab yubordi. Yodingizda bo'lsa, Samvel Babayan ham o'z zamonida Igor Sergeevga nisbatan shunday munosabatda bo'lgan edi...
Bosh sahifaga
62
