- SHuhrat, "Buxoro" bilan bo'lib o'tgan o'yin haqida nimalarni ayta olasiz? Safarda, kuchli raqib maydoniga durang qayd etilishini ijobiy baholasa bo'ladimi?
- Avvalambor, barchaga assalomu alaykum. "Buxoro" bilan o'yinda qayd etilgan natijani albatta, ijobiy baholasa arziydi. Sababi biz bugun Superligada ham o'ziga yarasha nom qozona olgan kuchli raqib bilan o'ynadik. Bu jamoa bilan safardagi durang yomon natija emas deb o'ylayman. "Zomin" asosan yosh futbolchilardan shakllangan jamoa. Tarkibga etibor berilsa, 90-95 foiz o'tgan mavsum Birinchi ligada jamoamizni Pro-ligaga olib chiqqan futbolchilar o'ynamoqda.
- Klub rahbariyati joriy mavsumda jamoa oldiga qanday vazifalarni qo'ygan?
- Mavsum boshida klub rahbariyati biz bilan uchrashib yuqori o'rinlar uchun kurasha olishimizga ishonch bildirishdi. Murabbiylar shtabiga Toshkentning "Obod" jamoasidagi faoliyati bilan yaxshi tanish bo'lgan yosh murabbiy Bobur Zuhridinov ham kelib qo'shildi. Hozirda u jamoa bosh murabbiyi Asqar Umarovga yaqindan yordam bermoqda. Klub rahbariyati navbatdagi mavsumlarda Superliga yo'llanmasini jamoa oldiga vazifa sifatida qo'yilishini ham alohida takidlab o'tishdi. Hozirda klub infratuzilmasi ajoyib xolatga keltirilgan va bu jarayon davom etmoqda.
- Avvalgi turlarda "Zomin" qayd etgan natijalar haqida qanday fikrdasiz? Masalan 1-turdagi ochilish o'yinida "Andijon" bilan 0:0 hisobida durang natija qayd etildi...
- Ochilish o'yinida "Andijon" bilan o'yindagi 0:0 hisobini ko'pchilik tasodif deya baholadi. Aslida natija o'z-o'zidan kelmaydi, barchasining ostida mashaqqat, mehnat yotadi. "Andijon" yaxshi shakllangan jamoa. Hozirda jamoani tajribali mutaxassis Viktor Kumikov boshqarmoqda. "Mashal" bilan o'yinda yutqazdik, "SHo'rtan"ni mag'lub eta oldik. Ishlashda davom etamiz.
- Siz jamoada sardorlik vazifasini ham bajarayapsiz. Aytingchi, bu futbolchiga qanday masuliyatlarni yuklaydi?
- "Zomin"da sardor Eldor Karimov hisoblanadi. U maydonga tusha olmagan o'yinlarda jamoa bosh murabbiyi tanloviga ko'ra, bu masuliyat mening zimmamga tushmoqda. Albatta, jamoa sardoriga bir qator masuliyatli vazifalar yuklanadi.
- Navbatdagi turda Yaypanning "Turon" klubiga qarshi maydonga chiqasizlar. Ushbu o'yin oldidan nimalarni aytgan bo'lardingiz?
- "Turon" bilan o'yinga ertadan jiddiy tayyorgarlikka kirishamiz. Ushbu o'yinda ham g'alaba uchun maydonga chiqamiz.
- Kuzatib borayapmiz, "Zomin"ni qo'llab-quvvatlash uchun ko'plab muxlislar stadionga muntazam tashrif buyurishadi. Joriy mavsumda ularga qanday natijalarni vada qilgan bo'lardingiz?
- Jamoamiz muxlislaridan hamisha minnatdormiz. Ular xatto noqulay ob-havo sharoitida ham stadionga kelib bizni qo'llab-quvvatlashmoqda. "Zomin" har doim muxlislar uchun o'ynaydi.
Bekzod Tolibov yozib oldi
Bosh sahifaga
209