Uchrashuvda 80-daqiqada zaxiradan maydonga tushgan Oliver SHarkich burilish yasadi. Aynan uning ajoyib pasidan so'ng Dragan CHeran g'alaba golini urishga erishdi. Joriy mavsum oldidan tarkibga yangi kelib qo'shilgan SHarkich sekin-asta jamoa o'yiniga ko'nikmoqda. Buni uning o'zi ham tasdiqlagan holda o'yin borasidagi fikrlari bilan o'rtoqlashdi.
- O'yin haqida...
- Bellashuv ilk daqiqalardan juda tajovuzkor ko'rinish oldi. Birinchi bo'limda gol yuzaga kelishida biroz sabr qilishimizga to'g'ri keldi. Ammo ikkinchi bo'limda jismoniy tarafdan kuchli ekanligimizni ko'rsatdik. Vaziyatlardan foydalana olmadik. Xudoga shukur juda ham kuchli raqib ustidan g'alaba qozondik. Draganning goliga assistentlik qilganimda xursandman. Bu mening mavsumdagi birinchi foydali harakatim bo'ldi.
- Jamoaga ko'nikish jarayoni qanday ketmoqda?
- Hali ham davom etmoqda. Ushbu jarayon yana ozroq vaqt davom etishi mumkin. CHunki o'yin uslubi boshqacha ekan. Angliyada futbol tez, O'zbekistonda esa agressiv. Ammo men ko'nikib ketish uchun borimni bermoqdaman.
- Angliya, Ispaniya va Portugaliya chempionatlarida to'p tepgansiz. O'zbekiston qanday taassurot uyg'otdi?
- Hayotimda birinchi marotaba O'rta Osiyoda bo'lishim. Bundan oldin faqat Qatarga borgan edim. Ikki mamlakatni bir xil deya olmayman. Ammo menga yurtingiz judayam yoqdi. Mahalliy odamlar mehnatkash va rostgo'y ekan. Toshkentda istiqomat qilib hayotdan bahra olmoqdaman.
- Bu erga kelishingizdan oldin nimalarni kutgan edingiz?
- O'zbekistonga kelishimdan oldin, katta klub va chempion jamoada o'ynashimni bilgan edim. CHempionat va OCHLda o'zimni ko'rsatib nimalarga qodirligimni isbotlashga harakat qilaman. "Paxtakor"dan taklif olganimda oilam va do'stlarim bilan maslahatlashib rozilik bildirdim. OCHLda tez va sifatli futbolni kutyapman. Hamma biladi ushbu turnirda yaxshi o'yinchilar va jamoalar o'ynashadi. Albatta qiyin bo'ladi. Biroq biz O'zbekiston chempionimiz va ishonamanki, guruhdan chiqa olamiz.
- "Navbahor" bilan o'yindagi stadiondagi muhit haqidagi fikringiz?
- Ajoyib, muxlislarimiz o'zgacha qushiqlar bilan bizni qullab-quvvatlashdi. Buni eshitish juda yoqimli. O'yindan keyingi "agressivlikni" aytmasa hammasi alo darajada kechdi. Futbol hissiyotlar qaynaydigan sport turi.
- Oliver sizning qaerdan ekanligingiz qiziq? Biz CHernogoriya, deb eshitdik. Ayrim manbalar Belgiya, Angliyani ko'rsatmoqda...
- Belgiya mamlakatida 2007-2017 yillar davomida yashaganman. So'nggi 3 yilni Angliyada o'tkazdim. Mening yurtim - CHernogoriya. Otam chernogoriyalik. Mazkur mamlakatning turli yosh toifasidagi jamoalarida to'p tepganman.
Bosh sahifaga
180
