Javlon Guseynov: "Murabbiylar almashinuvi sababli vazifadan uzoqlashib ketdik"

Yakunlangan mavsumda uning jamoasi chempionatni 6-o'rinda tugatdi. SHundan keyin biz Guseynov bilan mavsum yakunlari va rejalari bo'yicha suhbatlashdik.  

"Yakunlangan mavsum qiyin o'tdi, chunki chempionat markazlashgan holda o'tkazildi. Bilasiz, o'tgan yildan buyon mamlakatda koronavirus bilan bog'liq holat tufayli musobaqa shu tariqa davom etyapti. O'yinlar dastlab bo'linib-bo'linib o'tkazildi. Oxirgi uch oy davomida bahslar Bali orolida kechib, yakunda shu joyning asosiy jamoasi g'oliblikni qo'lga kiritdi. Umuman olganda, chempionat qiyin va murosasiz o'tdi", – deydi Guseynov. 

Vazifa bajarilmagani borasida

"Borneo" o'z oldiga chempionlikni maqsad qilib qo'ygandi. Asosiy vazifani bajarish uchun kurashdik. Lekin murabbiylar almashinuvi bo'ldi. Muhitda biroz o'zgarish yuz berib, keragidan ortiq ochkolarni boy berdik. Natijada, boshqa jamoalarni o'tkazib yuborib, maqsadga erisha olmadik. 

Murabbiylar almashinuvi xususida

Mavsum davomida ikki marotaba murabbiylar almashinuvi ro'y berdi. Oxirgi 10 ta o'yinda mahalliy mutaxassis qo'l ostida chempionatni yakunladik. Murabbiylarning almashinuviga ko'proq rahbariyat bilan kelisha olishmagani sabab bo'ldi. Ikkisi ham xorijlik mutaxassis edi. Natijalarimiz ham yomon emasdi. Istefodan keyingi oraliqda muhitda o'zgarish yuz berib, natijalar salbiy ko'rinish oldi. 

Faoliyati haqida

To'g'risi, yakunlangan mavsumdagi faoliyatimdan qoniqish hosil qilmadim. Xudoga shukrki, jarohatlarsiz tugatdim. Yangi mavsumda o'z ustimda ko'proq ishlab, yanada ko'proq yordam bermoqchiman. 

Kelgusidagi rejalari to'g'risida

Rejalarimga kelsak, "Borneo" bilan 2023 yilning fevraliga qadar mo'ljalangan shartnomam bor. Bu vaqt davomida bor kuchim bilan jamoamga yordam bermoqchiman. Yangi mavsumda muxlislarni stadionga kiritisharkan. Bu esa bizga qo'shimcha kuch beradi. Odatda Indoneziya chempionatida har bir bahsga o'rtacha 10-15 ming muxlis stadionga tashrif buyurardi. Ochig'i, mana shunday atmosferani sog'inib qoldik.

Eslatib o'tamiz, 30 yoshli Guseynov faoliyati davomida "Neftchi", "Andijon", "CHainat Xornbill" (Tailand), "So'g'diyona", AGMK klublari sharafini himoya qilgan.