Ammo yangicha formatda o'tadigan O'zbekiston chempionatining starti AGMK uchun omadsiz bo'ldi. Jamoa Superliganing 12 turidan keyin atigi 13 ochko jamg'argani tufayli yozda rossiyalik mutaxassisning o'rniga Baxtiyor Ashurmatov keltirildi.
Mavsumni 8-pog'onada yakunlagan jamoa O'zbekiston kuboki finalida Arveladzening "Paxtakor"i bilan qarshilashar ekan, olmaliqliklar "anderdog" sifatida ko'rilgani rost gap... Farg'onadagi o'yin va uning atrofidagi voqealar haqida bitta film olsa bo'ladi. Quyida o'qiydiganlaringiz shu haqda.
O'sha kuni "Istiqlol" stadioniga chiqib kelgan AGMK futbolchilari o'yin oxirida mag'lub bo'lishlari kerak edi. Aniqrog'i, ularga shunday ko'rsatma berilgan. Bu "missiya" amalsha oshishi mumkin edi. Qachonki, tarkibda Jasur Hasanov, Lutfullo To'raev va Kamoliddin Murzoev singari o'zini hurmat qiladigan, tajribali, eng muhimi, nomusli futbolchilar bo'lmasa...
Ular maxsus topshiriqqa qarshi chiqib, tarkibdagi barchani g'alaba uchun ruhlantirishdi. "Nastroy" shunaqa qilindiki, maydonga chiqib kelayotgan barcha o'yinga hayot-mamot masalasi sifatida qaray boshladi.
Bu ish berdi. "Paxtakor"ning nisbatan kuchli tarkibiga chempioantning har 2 o'yinini yutqazgan AGMK finalda hisobni ochdi.
54-daqiqada Gonsalvesh penalti orqali muvozanatni tiklagach, barcha "Paxtakor" o'yinga qaytishini kutgandi. Biroq 3 daqiqadan keyin Jokich dublni rasmiylashtirib, yana AGMKni oldinga olib o'tdi.
O'yin oxiriga yaqin Temur To'xtasinov boshchiligidagi hakamlar brigadasi katta sahnaga chiqdi. Referi, dastlab, CHeran To'raevning boshiga tepgan vaziyatni "ko'rmadi". Keyinroq Masharipov to'pni jarima maydoni ichida qo'li bilan o'ynagan vaziyatda penalti belgilanmadi...
Yuqoridagi videolavhani tomosha qiling. Jasur Hasanov ilojsizlikdan boshini changallayapti. Kasminin va Qilichev jamoa bugun hakamlarga qarshi o'ynayotganini tushundi. To'raev esa alam bilan bitta gapni takrorlardi: "Aka, Xudo bor"...
Darhaqiqat, Xudo bor! SHu tufayli AGMK 3-golni urib, kubok yutdi. Temur To'xtasinov esa 2 yildan keyin futboldan chetlatildi (malum muddatga).
Malumot uchun, o'sha davrda "Paxtakor"ning bosh homiysi hisoblangan "SFI Management Group" ayni paytda "Metallurg"ni moliyalashtiradigan "Uzmetkombinat" va Olmaliq shahrining bosh jamoasiga pul beradigan OKMKni boshqarar edi...
AGMK rahbariyati finaldan keyin Baxtiyor Ashurmatovni istefoga chiqardi. Uning ortidan To'raev, Murozoev va Hasanov ham Olmaliqdan ayrildi. SHu kundan beri "konchilar" "Paxtakor"ni yuta olishmayapti.
Bu hali hammasi emas. Ertaga ham Superliga doirasida o'tgan 2 o'yin va bu voqealardagi asosiy qahramon haqida gaplashamiz. Xullas, hikoyaning davomi bor...
mutolaa uchun: Eng qimmat o'zbek darvozaboni haqida
Bosh sahifaga
156
