Biz jamoaning sobiq bosh murabbiyi Bahrom Xakimov bilan qarshiliklar erishgan natijalarning kelib chiqish omillari haqida suhbatlashdik.
- Bahrom aka, siz "Nasaf" taqdiriga befarq bo'lmagan insonsiz. Jamoa hozir OCHLda guruh bosqichidan muvaffaqtyatli o'ta oldi. Mazkur tarixiy natija haqida fikrlaringiz qanday?
- Maqtashga kirib qolmasinu, "Nasaf" juda chiroyli futbol namoyish etmoqda. Namanganda "Navbahor" bilan kechgan o'yinni kuzatdim, barchasi alo darajada amalga oshirilmoqda. Jamoada bosh murabbiy sifatida ishlagan vaqtlarimda Ro'ziqul Berdiev jamoa sardori edi. Qiyin vaziyatlardan olib chiqib keta olardi, haqiqiy etakchi futbolchi bo'lgan. Men hozir bunday murabbiyga o'z vaqtida ustozlik qilganimdan faxrlanayapman. Jamoani uzatmalar qanday ishlashiga etibor qarating, futbolchilarning jismoniy imkoniyatlariga nazar tashlang, qoyil qolmasdan iloj yo'q. Bizni vaqt bilan 01:15da boshlangan o'yinlarda ham ular o'zlarini juda yaxshi ko'rsata olishdi, yani o'sha xududning iqlimiga, vaqtiga moslashish ular uchun qiyinchilik tug'dirmadi. Mazkur tarixiy natija bilan barcha o'zbek futbol muxlislarini, Qashqadaryo ahlini tabriklayman.
- Jamoa tarkibi kamtarona bo'lsa ham keyingi bosqich vazifasi uddalandi. Buning asosiy omili nimada deb o'ylaysiz?
- Jamoaning o'yini aniq uzatmalar asosida tashkil etilmoqda. Ko'plab yosh futbolchilarga qo'rqmay ishonch bildirilgan xolda kashf etilayapti. Bularning asosiy omili klubda akademiya yaxshi rivojlangani bilan bog'liq. "Nasaf"da murabbiylik qilgan vaqtimda stadion va akademiyalar qurilishiga guvoh bo'lganman. Yodimda bor, rahmatlik Nuriddin Zayniev meni yarim tunda chaqirtirgandilar. O'shanda u kishi zimmasida boshqa vazifalari bo'lishiga qaramasdan vaqt topib barcha jarayonlar bilan tanishib chiqqandilar.
"Nasaf" yoshlarga, bolalar futboliga oid qanday musobaqa haqida eshitib qolsa, albatta qatnashadi. Barcha yosh toifasidagi futbolchilarini erinmasdan jalb etadi. Hozirda jamoa asosan mahalliy futbolchilarni tarkibga jalb etishga harakat qilmoqda. Ayni damda o'zim "Turon" yoshlari bilan ishlamoqdaman. Bu klubda ham "Nasaf" singari tizimni yo'lga qo'yish harakatidamiz. "Turon" rahbariyati ham futbol rivoji uchun samarali ishlarni amalga oshirishmoqda. Mahalliy yoshlarga etibor qaratish, ularni futbolga jalb etish asosiy vazifalarimdan hisoblanadi. Futbolchilarni bosqichma-bosqich o'zimiz tayyorlab borsak, kam harajat bilan ham yaxshi natijalarga erishish mumkin. "Turon" mavsum yakunida Superliga yo'llanmasini qo'lga kiritsa, U-21 jamoasi uchun tayyor futbolchilar shakllangan bo'ladi.
"Nasaf"da tizim to'g'ri yo'lga qo'yilgan, har bir yosh futbolchining katta futbolga qadar bosib o'tadigan yo'li aniq reja asosida amalga oshiriladi. Maqtanish emasku, mening bosh murabbiylik vaqtimda ham Kenjaev, Qoraev kabi mahoratli futbolchilar etishib chiqqan. Bular safiga Xamroev, Toshmatovlarni ham qo'shish mumkin. Zafar Xolmurodov ayni o'sha davrda tanildi. Takror aytaman, mutaxassis sifatida ayni damda Ro'ziqul Berdiev va uning jamoasiga haqiqatdan ham qoyil qolayapman.
Bekzod Tolibov yozib oldi
Bosh sahifaga
290