- O'yin haqida
- O'yin qiziqarli kechdi. "Dinamo" himoyaga urg'u berib harakatlanishini bilardik. SHunga yarasha tayyorgarlik ko'rdik.
Qiyin uchrashuv bo'ldi, chunki raqib ham jismoniy tarafdan yaxshi holatda edi. 90 daqiqa himoyalanib, qarshi hujumdan foydalanishga harakat qildi.
O'yin boshida xato tufayli darvozamizdan to'p olib chiqdik. Undan keyin qiyin holatga tushdik. SHunga qaramasdan, gol urishga erishdik. Ko'p imkoniyatlarga ega bo'ldik, ammo zich himoyani yorib o'tish qiyin bo'ldi. Biz yaxshi o'ynab, ularga qarshi hujumda o'ynash uchun deyarli imkon qoldirmadik. Bundan tashqari, "Dinamo" zarba berishda qiynaldi.
- "Olimpik" darvozaboni Vladimir Nazarov oyoq bilan juda yaxshi o'ynaydigan posbon hisoblanadi. Biroq u ketma-ket 2-o'yinda qo'pol xatoga yo'l qo'ydi va jamoa shundan so'ng gol o'tkazib yubordi. "Olimpik" o'tgan o'yinda 5 ta gol urgani uchun bu bilinmagandi, bugun esa yaqqol sezildi...
- To'g'ri aytyapsiz. Xuddi shunday bo'lyapti. Ehtimol, u xotirjam o'ynashga intilyaptimi, bilmadim. U qattiqroq tepishi kerak edi. O'xshamay qoldi. Qarori to'g'ri, ammo ijroda xatolikka yo'l qo'ymoqda. Bugungi holat raqibga "sovg'a" bo'lib qoldi.
O'ylaymanki, bu sekin-asta o'nglanadigan holat. Bunaqasi ham uchrab turadi. U bilan gaplashamiz, muhokama qilib olamiz. U – sardor, ishonchli o'ynashi lozim. Ehtimol, keyingi safar boshqa darvozabonlarga imkon beramiz.
- O'rinbosarlar jamoasini ham o'zingiz boshqaryapsiz. Savolim: Asosiy jamoada necha daqiqa o'ynagan futbolchini ertasi kuni o'ynatmaysiz?
- Agar 45 daqiqa o'ynagan bo'lsa, o'ynatmayman. Undan kamroq harakat qilgan bo'lsa, o'rinbosarlar tarkibida imkon beraman. To'g'ri, ruhiy tarafdan qiyin bo'lishi mumkin.
Boshida qiyinchilik bo'lgandi. Hozir yigitlar moslashib ketishdi. Bir tarafdan bu foydali, futbolchi ko'proq o'ynashi kerak. SHu orqali ular o'sishadi.
- "Olimpik" o'tgan o'yinda juda zo'r o'ynagandi. Bugungi o'yin oldingi bahs fonida qo'polroq aytganda, rasvo bo'lib ko'rindi...
- Fikrlaringizga qo'shilaman. Bunga ko'plab faktorlar bor. "Dinamo" bilan "Bunyodkor"ni taqqoslash qiyin. CHunki "Dinamo" himoyaviy, yopiq o'ynagan bo'lsa, "Bunyodkor" ochiq o'yin ko'rsatgandi. Bu bizga qo'l keladi, chunki futbolchilarimiz qarshi hujumda tez harakat qilishadi. Ko'rdingiz, "Dinamo" ancha himoyaviy o'ynadi.
To'p nazoratini qo'lga olib, vaziyatlar yaratishga urindik. Qaerdadir xotirjamlikka berildik, qaerdadir ruhiy tomondan oqsadik. Yigitlarni diqqat-etiborni yo'qotmaslikka chaqirgandim. Balki bu ham tasir qilgandir. Hozir aniq bir narsa deya olmayman, ko'rib chiqamiz.
Bosh sahifaga
236