Maqsudov "Bunyodkor"dan faqat natija uchun ketdimi? Boshqa muammo ham bor

Ketma-ket uchta o'yindagi g'alabasiz seriyadan so'ng jamoa bosh murabbiyi SHuhrat Maqsudov vazifasidan ozod etildi. Hozirda ko'pchilik buning sababini faqat natijalarga bog'lamoqda. Lekin bu erda boshqa muammo ham bor.  

Futbol istaymizmi yoki yo'qmi muxlislar uchun o'ynaladi. Boshqacha bo'lishi ham mumkinmas. Biroq SHuhrat Maqsudovning o'tgan mavsum so'nggida va bu yil ishqibozlarga bo'lgan munosabati o'ziga nisbatan ishonch va hurmatning yo'qolishiga olib keldi. 

SHuhrat Maqsudov: "Bosh murabbiyni ishdan olish yoki tayinlash muxlislarning ishi emas"

Maqsudovdan nega istefo so'rashdi?

Hattoki, "Olimpik" bilan uchrashuvdan keyin muxlislar istefo talab qilishdi. Kecha esa "Metallurg" bilan o'yinning 75-daqiqalaridan so'ng maydonni tark etishdi. Gap natija haqida ketmayapti. CHunki bunday tarkib bilan stabillik ko'rsatish qiyin. Tushunarli holat. Gap bosh murabbiyning munosabatida. Muxlis stadionga keladi, qo'llab-quvvatlaydi, g'alaba kutadi. Boringki, mag'lubiyatli o'yinlarda norozi ohangda murabbiyga, futbolchiga ham tosh otadi. Ertaga Karpenko ham  muvaffaqiyatsizlikka uchrashni boshlasa, uni ham tanqid qilishadi.  Murabbiyning qismati shunday. Lekin u doim har qanday holatda o'z hurmatini saqlab qolishi kerak. So'nggi o'yinlardagi holatlarga etibor qaratadigan bo'lsak aftidan ichki muhitga putur etganini sezish qiyin emas.

Hozirda hamma qiyinchilik va yuk Viktor Karpenkoning zimmasiga tushadi. Uning murabbiylik salohiyatidan yaqqol xabardorman, deya olmayman. Bilganim "Bunyodkor" o'rinbosarlarini ikki mavsum boshqargan va 3-4 o'rinlar bilan cheklangan. U bosh murabbiy vazifasini bajaruvchi etib tayinlandi. SHunday ekan, kamida birinchi davra yakuniga qadar o'zini ko'rsatishi uchun imkon bo'ladi.  Ayni paytda asosiy qilinadigan ish futbolchilar bilan gaplashib olish va avvalgi ruhiyat, xotirjamlikni qaytarish. O'yinda ko'p narsa o'zgarmaydi, deb o'ylayman. CHunki Karpenko jamoa uchun begona shaxs hisoblanmaydi. Uning qo'l ostida tayyor jamoa va futbolchilar. Faqatgina to'g'ri ko'rsatma berib o'ynatish qoldi, xolos. Ortiqcha sarosimaga solishning hojati yo'q. Oldindagi o'yinlarda ko'ramiz va kuzatamiz.