Kunning ikkinchi yarimida navbati bilan tadbirlar start oldi. Dastlab mehmonlar poytaxtimizdagi "Bunyodkor" stadioniga tashrif buyurishdi va klub muzeyi bilan yaqindan tanishdilar. Undagi sovrinlar, o'zbek futboli tarixiga oid malumotlar berildi.
SHu kunning o'zida "Bunyodkor" stadioni anjumanlar zalida Italiya chempionati afsonalari Daniele Massaro, Alberto Jilardino, Vinsent Kandela, Aldair, va o'zbek futbolining yulduz futbolchilari Viktor Karpenko, Server Jeparov, Anvar G'ofurov, Kamoliddin Murzoev ishtirokida matbuot anjumani o'tkazildi. SHuningdek, rossiyalik taniqli sharxlovchi Nobel Arustamyan ham o'zining fikrlari bilan o'rtoqlashganini ko'rishimiz mumkin. Yakunda yosh futbolchilar uchun mahorat darsi ham tashkillashtirildi.
Ertangi uchrashuvni bevosita Nobel Arustamyan va Mirzahakim To'xtamirzaev sharhlab borishini aytib o'tish joiz.
Quyida anjumanda yangragan eng sara fikrlarni mutolaa qiling.
Vensan Kandela ("Roma", Franciya terma jamoasi sobiq futbolchisi): Avvalo bunday sharoitlar uchun minnatdorchilik bildirmoqchiman. Eldor SHomurodov "Roma"da debyut mavsumini o'tkazmoqda. Qolaversa Joze Mourinyu ham. Bu jamoada taktika ham o'zgacha. SHomurodov ko'p tushmagan bo'lsa ham, o'ynagan uchrashuvlarida foyda keltirgan. Texnikasi, jismoniy holati menga manzur kelgan. Ayrim jihatlar ustida ishlasa, SHomurodov kuchli futbolchi bo'lishi shubhasiz
Nobel Arustamyan: (Rossiyalik taniqli sharhlovchi) - Assalomu alaykum (o'zbek tilida). Bunday tadbirda ishtirok etish yoqimli. Ochig'i orzularim va rejalarimda bu o'lkaga kelish, madaniyati, futboli bilan tanishish niyatim bor edi. Moskvada ko'plab o'zbekistonliklar bor. Ular bilan do'stona aloqadaman. O'zbekiston futbol yurti. Aksariyat futbolchilarni bilaman. Ayniqsa Eldor SHomurodov. Italiyada uning mehmoni bo'ldim. Bu erda futbolni qanchalik yaxshi ko'rishlarini his qilmoqdaman. Talkif uchun katta rahmat.
Daniele Massaro ("Milan", Italiya terma jamoasi sobiq futbolchisi): 1994 yil Jahon chempionatidagi penaltidan uchralgan mag'lubiyatni unutish oson bo'lmagan. Lekin o'sha musobaqada futbolchilar o'z qobiliyatlaridan baland o'ynashgan. Har bir futbolchi maksimal o'ynagan. Biroq tan olish kerak, Braziliya terma jamoasi futbolchilarining texnikasi yuqori bo'lgan. Oradan 12 yil o'tib Jahon chempionligini qo'lga kiritganimiz mag'lubiyatni o'rnini to'ldirgan.
Viktor Karpenko ("Bunyodkor", O'zbekiston terma jamoasi sobiq futbolchisi): Menimcha, ertangi o'yinda g'alaba unchalik katta ahamiyatga ega emas. Muhimi muxlislarga chiroyli futbol ko'rsatish. Natija? Qancha ko'p gol bo'lsa ishqibozlarga shuncha yaxshi.
Alberto Jilardino ("Milan", Italiya terma jamoasi sobiq futbolchisi): - "Milan" juda yosh jamoa. Ularga motivaciya beradigan Ibragimovich bor. Tajriba ham muhim. Klub ortida turgan Maldini, Massaro bilganlari bilan o'rtoqlashmoqda.
Daniele Massaro: "Milan"ga bu yil juda qiyin bo'lmoqda. Boisi bir yilda 3ta rahbar o'zgardi. Ayni payt deyarli chempionlikka erishdi. Bugungi kunda klubning siri to'g'ri tanlovda. Menejer, direktorlar to'g'ri tanlangan. Bizda tayyor va tajribali murabbiylar bor. Hozirni o'zida ularning yordamidan foydalanishingiz mumkin.
Aziz Haydarov ("Bunyodkor", O'zbekiston terma jamoasi sobiq futbolchisi) : Futbol yulduzlari ishtirokida shou bo'ladi, deb aytildi. Milliy terma jamoa libosini kiysangiz o'z-o'zidan g'alabani o'ylaysiz. O'ylaymanki, bir-birimizni hurmat qilib oyoqni olib qochmasdan futbol o'ynaymiz. Sardor kim bo'ladi? SHu paytgacha sardorlar ko'p bo'lgan. Milliy jamoada o'ynaganmiz, sardor bo'lmaganmiz. Buni o'zlari hal qilib olishadi. Biz kichkina futbolchilarmiz.
Anvar G'ofurov ("Bunyodkor", O'zbekiston terma jamoasi sobiq futbolchisi): Muxlislar shou o'yinidan yaxshi kayfiyatda ketishlari kerak.
Kamoliddin Murzoev ("Bunyodkor", AGMK jamoalari sobiq futbolchisi): Ushbu tadbirni tashkil qilgan barchaga rahmat. Endi mazkur loyiha haqida gapiradigan bo'lsam, qaysidir manoda o'zbek futbolining 110 yilligining kulminacion nuqtasi hisoblanadi.
Fotosuratlar muallifi: Jahongir Fayzullaev
Bosh sahifaga
102
