Anvar Berdiev: "Xorazm" jamoasi uy o'yinlarini tezroq tabiiy maydonda o'tkazishlariga tilakdoshman"

O'yin haqida

- Bugun qiyin uchrashuv o'tkazdik. Albatta, biz bu o'yin qiyin bo'lishini bilardik. "Xorazm" jamoasiga tezroq suniy maydondan chiqib uy o'yinlarini tabiiy maydonda o'tkazishlariga tilakdoshman.

Farg'ona viloyatidan uzoq yo'l bosib kelib bizni qo'llab-quvvatlagan muxlislarga jamoamiz nomidan rahmat aytaman. SHuningdek, "Xorazm" jamoasini o'yin davomida faollik bilan ishqibozlik qilgan mahalliy muxlislarga ham minnatdorchilik bildiraman.

- Sizningcha, "Turon" bugun 1 ochko qo'lga kiritdimi yoki 2 ochko yo'qotdimi?

- O'yinning borishidan kelib chiqsak, biz 2 ochko yo'qotdik. CHunki so'ngi daqiqalarda Bobur Qosimovning maydon egalari darvozasiga kiritgan goli inobatga olinmadi. Bu vaziyatda yaqqol gol bo'lgandi, bilmadim, yon hakamlar bu kabi qarorlarni qanday chiqarishadi, xayronman. Qiyin maydonda o'yin o'tkazayapmiz, hakam birgina tushunarsiz qarori bilan yigitlarning shuncha mehnatini yo'qqa chiqardi. To'g'risini aytganda, yigitlarning mehnatiga achinayapman.

- Anvar aka, siz o'z vaqtida mohir hujumchi bo'lgansiz. SHundan kelib chiqib aytingchi, o'zbek futbolida hujumchilar tanqisligiga sabab nima?

- O'zbek futbolida hozir yaxshi hujumchilar bor. Keyingi yillarda ularning soni yanada ko'payadi. Bizga hozirda hujumchilar bilan ishlaydigan alohida murabbiylar zarur. SHunda albatta kelajakda hujumchilar tanqisligi muammosi bartaraf etiladi, ko'plai istedodli hujumchilar etishib chiqadi deb o'ylayman.