Mazkur mamlakat borasida bizda aytarli malumotlar yo'q. SHunday bo'lsa-da, ushbu ekzotik yurt va uning chempionatida o'ynagan hamyurtlarimiz fikrlariga quloq tutdik.
- Ahror, siz o'ynagan vaqtda Maldiv orollari chempionatida nechta jamoa ishtirok etgan?
- Men ikki mavsum o'ynaganman. Dastlab “Iglz” va keyinchalik “Da Grande” klublarida. O'sha paytlari Maldiv orollari Oliy ligasida 9ta jamoa ishtirok etgan.
- CHempionat qachon boshlanar va qachon o'z poyoniga etardi?
- Asosan dekabr oylarida boshlanardi. Yakun esa iyul va avgust oylariga to'g'ri kelardi. O'rtada terma jamoalar o'yinlari sababli bazida cho'zilishi ham mumkin edi.
- Jamoalarning barchasi bitta stadionda to'p tepishlari rostmi?
- Albatta. CHunki mamlakat juda kichkina. Qolaversa, barcha Oliy liga ishtirokchilari poytaxt – Male shahrida istiqomat qilishadi. SHu erdagi suniy qoplamali o'yingohlarda mashg'ulotlar o'tkazishadi. Asosiy stadion esa tabiiy bo'lib, holati juda yaxshi deya olaman.
- Klublar qaysi tashkilotlar tomonidan moliyalashtiriladi?
- Barcha klublar mamlakat futbol federaciyasi tomonidan moliyalashtiriladi.
- Legionerlar limiti qanday?
- Limit doimgidek, 3+1 shaklida. Ular ham o'z ehtiyojlariga ko'ra, 3 yoki 4ta xorijlik futbolchining xizmatiga tayanadi.
- Legionerlar tanlashda klublar asosan qaysi qita vakillariga etibor qaratishadi?
- Evropaliklarga etibor katta. O'z oldiga yuqori maqsad qo'ygan jamoalar asosan evropalik ijrochilarni olib kelishga intiladi. Qolganlar afrikalik, bazilari esa misrliklarni afzal ko'rishadi.
- Maldiv terma jamoasi ishtirokidagi o'yinlarni bevosita stadiondan kuzatganmisiz?
- Ha, albatta. Adashmasam, terma jamoa ishtirokidagi taxminan 10ta uchrashuvni kuzatib borganman.
- Terma jamoa azolari futboldan tashqari boshqa sohada ham ishlaydimi?
- Yo'q. Qolgan futbolchilar esa bank, policiya va turli boshqa sohalarda o'zlarini sinab ko'rishadi.
- Maldiv futbolining yutug'i nimada?
- Futbolchilari jismoniy holatdan ko'ra, texnikaga ko'proq etibor qaratadi. Deylik, texnikasi yaxshi bo'lgan iqtidorli o'yinchilari bor. Buni terma jamoa misolida ham ko'rish mumkin.
Samandarbek suhbatlashdi
Bosh sahifaga
3349