Ushbu sahifada o'yinning matnli translyaciyasini kuzatib borish mumkin.
Superliga, 3-tur.
Qoldirilgan o'yin.
AGMK — "Nasaf" - 2:2
26 iyun 2022 yil. Olmaliq, OKMK stadioni. 20:00
Hakamlar: Ilgiz Tantashev, Rishat Nugmanov, Doniyor Saylovov, Sultonmurod Abdurahmonov.
VAR hakami: Aziz Asimov.
VAR yordamchi hakami: Timur Gaynulin.
Nazoratchi: Igor Nexochin.
Gol: Norchaev, 26 (0:1), Haqnazariy, 66 (1:1), Boake, 75 (2:1), Abdurahimov, 82 (2:2)
AGMK: 35.Valijon Rahimov - 7.Dilshod Ahmadaliev, 8.Abdulla Abdullaev, 5.Anzur Ismoilov, 2.Akrom Komilov - 17.Sanjar Tursunov, 4.Mirjamol Qosimov, 88.Siyavush Haqnazariy - 22.SHohruh Gadoev, 23.Aleksandr Kasyan, 10.Xurshid G'iyosov.
Zaxira: 1.Botirali Ergashev, 45.Jamoliddin Hikmatov - 9.Zafar Polvonov, 15.Andrey Mishenko, 27.Martin Boake, 31.Ahmadullo Muqimjonov, 63.Alisher Jalilov, 77.Nodir Abdurazzoqov.
"Nasaf": 1. Umidjon Ergashev, 4. Xusniddin Aliqulov, 5. G'olib G'aybullaev, 7. SHarof Muhiddinov, 8. Dilshod Saitov, 10. Xusayn Norchaev, 17. Suhrob Nurulloev, 22. Akmal Mozgovoy, 77. Oybek Bozorov, 88. Marko Stanoevich, 92. Umarbek Eshmurodov.
Zaxira: 13. Azamat Soyibov, 35. Abduvohid Nematov - 2. Alibek Davronov, 9. Ivan Solovev, 18. Bahrom Abdurahimov, 20. SHaxzod Akramov, 23. Sardor Sadullaev, 30. Aziz Xolmurodov, 34. SHerzod Nasrullaev.
MATNLI TRANSLYACIYA
UCHRASHUV YAKUNLANDI! Jangovar o'yinda jangovar durang qayd etildi.
90+5. Mishchenko qo'polligi uchun ogohlantirildi.
90+4. O'zgarish: Gadoev o'rniga Nodir Abdurazzoqov maydonga tushdi.
90+3. Dastlab Bozorov, keyin esa Norchaev o'ta qulay vaziyatlardan foydalana olmadi.
90. Ikkinchi bo'limga 6 daqiqa qo'shib berildi.
88. Ikkala jamoa futbolchilari "kalla urishtirishdi". SHifokorlar sahna markazida.
85. Nasrullaevning zarbasiga aniqlik etishmadi.
82. GOOOOOOOOOOOOOLLLLLLLLLLLL!!! Abdurahimov hisobni tenglashtirdi! Eshmurodovning himoyadagi standart ijrosidan so'ng Aliqulov faol harakat qilib, ikkinchi qavatda ustunlik qildi. Bahrom esa hujumni muvaffaqiyatli yakunladi.
80. Olmaliqliklar oldinga chiqib olganiga qaramay, hujum qilishda davom etmoqda.
75. GOOOOOOOOOOOOOOLLLLLLLLLLLLLL!!! BOAKE!!! Kambek! Mana buni hujumchi desa bo'ladi!!!
73. "Nasaf"da birato'la uch o'zgarish: Dilshod Saitov, Suhrob Nurulloev, Marko Stanoevich maydonni tark etdi, Marko Stanoevich, Ivan Solovev va Bahrom Abdurahimov o'yinga qo'shildi.
72. Aliqulov ogohlantirildi.
68. AGMKda ikki o'zgarish: Qosimov va Kasyan maydonni tark etdi, Andrey Mishenko hamda Martin Boake o'yinga qo'shildi.
66. GOOOOOOOOOOOOOOOLLLLLLLLLLLL!!! Komilovning pasidan so'ng Haqnazariy kuchli zarbasi bilan to'pni darvozaga joylab qo'ydi!
63. Ikki raqib futbolchilari to'p ketidan quvlashmachoq o'ynadi. Gadoev to'pga endi etdim deganda, to'p yumalab maydon tashqarisiga chiqib ketdi.
61. Haqnazariy dastlab sherigining pasini to'xtatolmadi, keyin esa alamini Mozgovoydan oldi.
57. Kasyanga "Nasaf" mukofot puli ajratishi kerak. AGMK foravrdi deyarli bir metrdan raqib darvozasini ishg'ol qilolmadi.
55. Tursunov Italiya faxriylari posboni Abyattiga urgan golini takrorlagisi keldi, biroq har gal o'xshayvermaydi-da.
54. Nurulloev hakam hushtagidan so'ng zarba berganligi uchun "minnatdorchilik sifatida" sariq kartochka mukofoti bilan siylandi.
53. Qarshiliklarga qarshilik qilish mushkul bo'lmoqda. Jamoa navbatdagi standartni ishlab oldi.
49. Gadoevdan javob. O'ng qanotdan oldinga borgan futbolchining pasidan so'ng Kasyanning oyog'i kaltalik qildi.
48. "Nasaf"ning "Bavariya" uslabidagi hujumining yakuni bavariyacha bo'lmadi.
46. Ikkinchi bo'lim boshlandi.
Birinchi bo'limga 1 daqiqa qo'shib berildi va yakuniga etar-etmas hakam hushtagini chaldi. Tanaffus.
45. Bozorov Abdullaevni maktab bolalari singari aldab o'tib, zarba yo'lladi, biroq uning zarbasiyam ikkichi maktab bolalariniki singari amalga oshdi.
44. Standartdan so'ng Ergashev mashg'ulotlardagi odatiy harakatlarini amalga oshirib, qo'llarini barchadan yuqoriga cho'zgancha, to'pni o'zlashtirib oldi.
43. Haqnazariy haqqoniy tarzda burchak zarbasi ishlab oldi.
40. Mozgovoy shifokor amakilarning xizmatiga ehtiyoj sezdi.
38. "Nasaf"ning burchak zarbasi bartaraf etildi.
36. Gadoev G'aybullaevga nisbatan qo'pollik ishlatdi. Hakamga "O'zi boshladi", deya etiroz bildirdi.
33. ZARBAAAA! Ismoilovning kechirilmas xatosidan so'ng Norchaev chap oyoqda zarba yo'lladi, to'p darvoza ustuniga tegib qaytdi.
32. G'aybullaev ham gol urgisi keldi, biroq undagi zarbaning gol bo'lish ehtimoli juda-juda past edi.
26. GOOOOOOOOOOOOOLLLLLLLLL!!! NORCHAEV!!! O'ng qanotdan Stanoevichning uzatmasini ikki bo'ydor raqib himoyachilar qurshovida turgan Husayn bosh bilan darvozaga joylab qo'ydi! Valijon Rahimov ham keyin ko'rolamanmi-yo'qmi deya indamasdan golni tomosha qildi.
25. Stanoevichning zarbasi ham o'zi istagan adresga etib bormadi.
24. Aliqulov merganligini uzoq masofadan sinab ko'rdi, hozircha biroz ishlash kerak ekan.
21. Norchaev Salohning kayfiyati bo'lmagan paytidagi ijro etadigan zarbalaridan birining nusxasini ijro etdi.
20. Komilovning uzatmasidan so'ng "Nasaf" darvozaboni to'pni qatradi, shu bilan birga, to'p raqib futbolchisidan maydon tashqarisiga chiqishini taminladi.
17. G'aybullaev Kasyanni oldinga yolg'iz yuborgisi kelmadi hamda ko'kragini erga tekkazdi, oqibatda hakam olmaliqlik futbolchi foydasiga qaror qabul qildi.
16. Bozorov-Mozgovoy kombinaciyasi yakuniga etmay qoldi.
13. Kasyan tabloga qaraydigan kishini ishga solishiga bir bahya qoldi.
12. Bozorov zarbasining spidometri past ko'rsatkichni qayd etdi, bu esa raqib posboniga qiyinchilik tug'dirmadi.
10. Bozorov raqib darvozaboni bilan birga-bir vaziyatda qoldim deb endi ichiga quvonib turganida, hakam "Yo'q, ofsaydda qolding", deya uning quvonchiga barham berdi.
8. Gadoev o'yindan so'ng "Cinepar gel" olishiga to'g'ri keladi shekilli, har holda "Nasaf" futbolchilari shunga majbur qilishmoqda.
6. "Nasaf" futbolchilari "Bo'ldi-da, o'z uslubimizdan chekinmaylik", deya oldinga tashlanishdi. Dastlabki yurishdan so'ng burchak to'pi ishlandi.
4. Mezbonlar dastlabki daqiqalarda hujumlar yomg'irini amalga oshirishmoqda, "Nasaf" esa bunga qarshi mudofaa "soyaboni"i bilan himoyalanmoqda.
2. Tursunovga nisbatan Stanoevich qo'pollik ishlatdi.
1. Uchrashuvni "Nasaf" futbolchilari boshlab berdi.
Olmaliqliklar bugun 4-3-3, qarshiliklar esa 3-4-3 sxemasida o'ynni boshlaydi.
Bugun AGMK oq, "Nasaf" esa qizil rangli libosda maydonga chiqdi. Eslatib o'tamiz, ushbu uchrashuv Superliga 3-turining qoldirilgan bahsi hisoblanadi.
Assalomu alaykum, qadrli futbol ishqibozlari! Dam olish kunida futbolga borishga eringan bo'lsangiz-da, muzdek qovun-tarvuzni suygancha, ekran yoki telefon qarshisida qiziqarli futbol guvohiga aylanishga nima etsin!
- Uchrashuv soat 20:00da boshlanadi.
Bosh sahifaga
69
