O'yindan keyingi matbuot anjumanida "So'g'diyona" klubi bosh murabbiyi Ulug'bek Baqoev va uchrashuvning eng yaxshi o'yinchisi Jasur Hasanov qatnashdi.
- Ajoyib g'alaba bilan tabriklaymiz. Janob murabbiy, ushbu o'yin va keyingi bosqichga yo'l olganingiz haqida gapirsangiz...
- O'yin bo'yicha biz g'alaba qozondik. Har taraflama bugun ustunlik qildik. Jamoa azolari, muxlislar va klub rahbariyatini g'alaba bilan tabriklayman. Etibor uchun rahmat deb qolaman. Oldinga qadam bosishda davom etamiz. Jizzaxlik muxlislar endi ushbu musobaqa o'yinini ko'rishlari mumkin bo'ladi. Bu esa juda quvonarli.
- Jasur, sizni g'alaba bilan tabriklaymiz. Guruh bosqichidagi uchta o'yindan keyingi fikrlaringiz qanday?
- Turnirni g'alaba bilan boshlab, g'alaba bilan tugatdik. SHunisi bizni quvontirdi. Musobaqa tashkilotchilariga minnatdorchilik bildiraman.
- G'alaba bilan tabriklayman. Janob murabbiy, keyingi bosqichlarda duch keladigan kuchli raqiblarga qarshi "So'g'diyona" qanday harakat qiladi?
- Ortda qolgan uch o'yinni analiz qilsak, biz har bir uchrashuvda o'sishga erishdik. Har bir o'yinda rotaciya qildik. Raqiblarga kelsak, hozirda futbolda oldindan bir narsa deb bo'lmaydi. Har qaysi klub syurpriz taqdim qilishi mumkin. Raqibimiz kuchli klub bo'lsa ham, biz ularga kurash taklif qilamiz.
- Jasur Hasanovga savol, yaqinda 39 yoshni qarshi olasiz. SHunga qaramay, gollar kiritish, assistlar qayd etishdan to'xtamayapsiz. Buning siri nimada?
- Oldingi o'yinda ham aytib o'tdim. Ushbu muvaffaqiyatning kaliti shundaki, men har bir o'yinga to'g'ri tayyorlanaman, to'g'ri ovqatlanaman va o'z vaqtida dam olaman.
- Jasur Hasanovning musobaqa davomida ko'rsatgan ajoyib o'yiniga murabbiyning fikri qanday?
- Biz bu yigit bilan bir klubda o'ynaganmiz. Birga terma jamoada harakat qilganmiz. SHunday paytlar bo'lganki, u men urgan gollarga assistentlik qilgan. Jasur haqiqiy professional. Menga uning maydondagi va maydon tashqarisida o'zini tutishi yoqadi. SHu bilan birga, u jamoada ajoyib muhit yarata oladi. Bu juda muhim narsa. SHu sabab ham bu yigit haligacha yuqori saviyada o'ynab kelmoqda.
- Murabbiyga savol. Sizning keyingi raqibingiz "Xo'jand" jamoasi. Raqib haqidagi fikringiz qanday? Ushbu o'yingacha tarkibingizda o'zgarishlar bo'ladimi yoki bunga hojat yo'qmi?
- Qanday raqib bo'lishidan qatiy nazar, biz ularni hurmat qilamiz. "Xo'jand" ham kuchli jamoa. Selekciya masalasiga kelsak, biz albatta bu ishni amalga oshiramiz. Ikki-uch poziciyani kuchaytirimiz lozim. Bu narsaga zaruriyat borligini bugun ko'rdik. Hozir chempionatga etiborni qaratamiz va undan keyin OFK kubogidagi raqibga qarshi tayyorgarlikni boshlaymiz.
- Hisob 3:0 bo'lishiga qaramasdan, murabbiyning qaysidir vaziyatlarda jahli chiqdi. Bu nima bilan bog'liq edi?
- Bilasizmi, siz o'yin ichida bo'lsangiz bu narsa tabiiy kechadi. Men har bir o'yinchim o'zining eng yaxshi o'yinini ko'rsatishini xohlayman. SHu tarafdan qaraganda, hissiyotlarni boshqarib bo'lmaydi. Hisobning ahamiyati yo'q. Men o'zimni har doim shunday tutaman. Buning sababi nima ekanligini bilmayman.
- Ulug'bek aka, g'alaba bilan yana bir bor tabriklaymiz. Kelib chiqishingiz bo'yicha tojik millati sizga begona emas. Tojikistonlik futbol muxlislariga aynan tojik tilida ikki og'iz nimadir deya olasizmi?
- Rahmati kalon, tashakkur. Tojikistondagi muhit ajoyib. Insonlari mehmondo'st. Men bu erda o'zimni uyimdagidek his qildim.
Bosh sahifaga
405
