Futbolchilik faoliyatida Kievning "Dinamo" klubidagi ajoyib va sermahsul o'yinlari bilan muxlislar mehrini qozongan SHackix keyinchalik murabbiylik ishini ham ushbu klubda boshladi. Akademiya jamoalaridan keyin asosiy jamoa murabbiylar shtabida faoliyat yuritdi. Keyinchalik Rossiyaning "Rotor" klubida ishladi. Iyun oyidan beri u "Paxtakor"da sport direktori sifatida ishlab kelayotgandi. Bugun "Paxtakor" futbol klubi va Maksim SHackix o'rtasida uch yillik shartnomaga imzo chekildi. Valeriy Lobanovskiy singari mutaxassis qo'l ostida "Dinamo" Kievda o'ynagan SHackix zamonaviy futbol bilimlarini yaxshi o'zlashtirgan. U katta klubda akademiyadan asosiy tarkibgacha bo'lgan yo'lni iqtidorlarning tizim asosida bosib o'tishiga yordamlashgan, yosh va yuqori salohiyatli futbolchilarni tajribali o'yinchilar bilan uyg'unlashtirgan holda ishlashni yaxshi o'zlashtirgan. Maksim Aleksandrovich "Paxtakor" bilan ko'plab g'alabalarga erishadi deb umid qilamiz. Uch yillik shartnoma muddati ham klubning SHackix bilan rejalari ulkanligini ko'rsatadi.
Jismoniy tayyorgarlik murabbiyi sifatida ukrainalik Vitaliy SHpanyuk taklif etildi. 51 yoshli mutaxassis faoliyati davomida Ukrainaning "Kremen", "Arsenal", "Slavutich", "Karpati", "Lvov", "Vorskla" va LNZ, Rossiyaning "Anji", "Rotor", Gruziyaning "Dinamo" Tbilisi klublarida ishlagan. SHuningdek, uch yarim yil davomida Ukraina milliy terma jamoasida ishlagan.
SHackixga yordamchi sifatida Vyacheslav Belyaev ishlaydi. U Ukrainaning "Tavriya", "Metallist", Gruziyaning "Dinamo" (Tbilisi) va Rossiyaning "Rotor" klublarida faoliyat yuritgan. Mahalliy mutaxassislardan Denis Ivankov (darvozabonlar murabbiyi), Kamoliddin Tojiev (tahlilchi) va Yuriy Siyanov (jismoniy tayyorgarlik) SHackixga yordam berishda davom etishadi.
Bosh sahifaga
115
