Jumladan, AGMK futbolchilari ayni paytda "Archazor"da shug'ullanishmoqda. Biz olmaliqliklar sardori Sanjar Tursunov bilan bog'lanib, qisqa suhbat uyushtirdik.
— Sanjar aka, mavsumning dastlabki qismi siz uchun qanday o'tdi?
— Rostini aytsam, birinchi davradan qoniqmadim. Har xil kutilmagan syurprizlar bilan to'qnashdik, mag'lubiyatlar bo'ldi. SHu tufayli tanaffusdan keyin yaxshiroq o'yin ko'rsatishimiz kerak.
— CHarchoq bilinmayaptimi?
— Yo'q, toliqish alomatlari yo'q. Nega desangiz, oldingi yildagidek CHempionlar Ligasida o'ynamayapmiz. Modern futbolda jismoniy jihatlar hal qiluvchi rolni o'ynayapti. SHunga har doim tayyor holatda bo'lishga harakat qilamiz.
— "So'g'diyona" bilan o'yindan keyin uchrashuvlarda niqob bilan ishtirok etdingiz. Ayni paytga kelib, jarohatdan to'liq tuzaldingizmi?
— O'sha to'qnashuvda bir emas, bir nechta jarohatga yo'liqib qoldim. Asoratlar kuchayib ketmasligi uchun faqat "maska"da o'ynashimga ruhsat berishdi. Bu, albatta, noqulay. Umid qilamanki, 2-davraning birinchi o'yinida niqob taqishga majbur bo'lmayman.
— Odatda o'zbek futbolchilari dam olish uchun Dubay yoki turk shaharlaridan birini tanlaydi. Siz tatilni Ispaniyada o'tkazdingiz. Taassurotlar qanaqa?
— Evropa shaharlarida dam olsangiz, vaqtingizni faol tarzda o'tkazasiz. SHaharlarni yayov aylanish, atrofni tomosha qilish yoqadi. Vaqtingiz behuda ketmaydi.
— 2-davraga tayyorgarlik qanday bo'lyapti? AGMKdagi ichki muhit qanday?
— Hammasi yaxshi ketyapti. Tanaffusdan keyin o'zimizni ko'rsatishimiz kerak. Ichki muhit yaxshi. Bilasiz, Qo'shoqovich har doim jamoani birinchi o'ringa qo'yadilar va futbolchilardan ham shuni talab qiladilar.
— Mirjalol Qosimov barcha shogirdlarini shashlik bilan siylaganini ko'rdik. Professional futbolda murabbiylarning shunday iltifotlari ham jamoadagi jipslikni oshirishga xizmat qiladimi?
— Ha, Qo'shoqovich bizni har yili shashlik bilan mehmon qiladilar. SHaxsan o'zlari pishiradilar, biz ham yordamlashamiz. Umuman olganda, zavqli jarayon. Rossiyada o'yganimda ham shunaqa tadbirchalar bo'lardi. Bu jamoa ichidagi umumiy xarakterni oshiradi, kayfiyat ko'tariladi.
— Denisov "So'g'diyona"ga o'tganini eshitdingizmi?
— Hozircha Vitaliy bilan gaplashganim yo'q. Rostan ham shartnoma imzolagan bo'lsa, O'zbekistonga qaytganidan xursandman. CHunki u uzoq yillar yuqori darajada to'p tepdi. Denisov singari nomlarning kelishi chempionatimiz uchun foydali bo'lishi aniq.
— U yarim yil futbol o'ynamadi. Denisovning tez orada oldingi saviyasiga chiqishiga ishonasizmi?
— Vitaliy "Baltika"dan keyin biroz dam oldi. O'ylashim bo'yicha, bu darajadagi o'yinchilarda hech qanday muammo bo'lmasa kerak. Hozir chempionatimizda undan tajribaliroq nechta o'yinchi bor? Menimcha, tez orada jismoniy holatini ham tiklaydi va jamoasiga faqat foyda keltiradi.
— Suhbat oxirida Denisovga qandaydir tilak yoki "vyzov" yo'llashingiz mumkin...
— Unga faqat omad tilayman. Jarohatlar Vitaliydan uzoqroq yursin. "Vyzov" deganda unga qarshi o'yinni hozirdan kutyapman. Biz bolalikdan birga o'ynaganmiz. Keyinroq terma jamoa sharafini elkama-elka himoya qildik. Endi raqib sifatida o'ynash ikkimiz uchun ham qiziq bo'ladi. Nafaqat unga, balki butun o'zbek futboliga omad yor bo'lsin. Hech qaysi hamkasbim jarohat yo'liqmasin. Yaxshi kunlarda ko'rishaylik!
Obuna bo'ling → FA| futbol ANALIZI
Bosh sahifaga
265