Zohir Pirimov: “Faoliyatim davomida birinchi marotaba shunday holatga duch keldim”

Futbolchi termizliklar safida birinchi davrada o'yin amaliyotisiz qolib ketdi. Natijada, u jamoa bilan xayrlashdi. SHundan keyin futbolchi bilan bog'lanib, ketish sabablari va rejalari borasida fikrlariga quloq tutdik. 

- Zohir aka, “Surxon”ni tark etdingiz. Nima sababdan bu qarorga keldingiz?

- Jamoani tark etishimning asosiy sababi kam o'yin amaliyotiga ega bo'ldim. Deylik, birinchi davra yakunida bosh murabbiy bilan gaplashdim. Ikkinchi davrada ham ko'p o'yinlarda zaxirada qolib ketishim mumkinligini aytdi. Menga esa bu to'g'ri kelmasligini aytdim va shartnomani kelishgan holda bekor qildik. CHunki butun faoliyatim davomida bunday holatga birinchi marotaba duch kelmoqdaman. Har mavsum kamida 15ta uchrashuvdan kam o'ynaganimni eslay olmayman. 

- O'yin amaliyotisiz qolib ketishingizga qandaydir sabablar bormidi?

- Bilmadim. Bu savolni ko'proq murabbiyga berilsa to'g'ri bo'lardi. Kam o'ynayotganim sababli murabbiy bilan gaplashganmizda har doim mening tajribamga ishonishini takidlab kelardi. Yoshlarga ko'maklashishimni so'rardi. O'z navbatida men ham qo'limdan kelgancha yordam berishga harakat qildim. Mashg'ulotlarda doimo bor kuchim bilan mehnat qilib keldim.  Balki bosh murabbiyning uslubiga mos kelmagan bo'lsam kerak. O'yin amaliyotisiz jamoada qolishni o'zimga ep ko'rmadim. Men doimo jamoa uchun qo'limdan kelgancha yordam berishga odatlanganman.

- Aytingchi, bosh murabbiy bilan qandaydir kelishmovchilik bo'lganmi?

- Murabbiy bilan hech qanday muammo bo'lgani yo'q. Munosabatlarimiz joyida edi.

- Anxel Lopes “Surxon”ni qay darajada kuchaytira oldi?

- O'zgarish qila oldi. Deylik, jamoa o'yinda tajovuzkorlik, hujumkorlikni oshirishga intilmoqda. Ko'plab futbolchilarning o'ziga bo'lgan ishonchlarini qaytara oldi. 

- Transfer oynasi yakunlanishiga kam fursat qolmoqda. Takliflar bormi?

- Bir nechta jamoalardan takliflar bor. Lekin hali aniq emasligi bois, bir qarorga kelganim yo'q.

- Yoshingizdan kelib chiqib aytadigan bo'lsak, hozir ham Cuperligada yuqori sport formada o'ynay olasizmi?

- Albatta Superligada bor kuchim o'ynay olaman. Bu hali hammasi tugamaganini isbotlashga harakat qilaman.