Samvel Babayan boshchiligidagi "lochinlar" safarda Berdievning "ajdarlar"ini kichik hisobda mag'lub qildi. O'yin davomida namanganliklar jismoniy jihatdan kuchliroq ekani ko'rinib qoldi. "Nasaf" yana bir bor tanaffusdan yomon kayfiyatda qaytdi...
Siz uchun g'alati eshitilishi mumkin. Ammo "Nasaf" so'nggi 5 yilda "Navbahor" qarshisiga favorit jamoa sifatida chiqa olmayapti. Bu statistikada ham yaqqol ko'rinadi.
Fakt: "Nasaf" "Navbahor"ni Superliga doirasidagi qatorasiga 11-o'yinda ham mag'lub qila olmadi. Bu uchrashuvlarning 7 tasida kuchlar teng kelgan bo'lsa, 4 tasida namanganliklar zafar quchgan.
3 ochkoni qo'yib turing. "Nasaf" 5 o'yindan beri "Navbahor" darvozasiga gol ura olmayapti.
"Ajdarlar" so'nggi bor Namangan klubini 2017 yilning yozida mag'lub qilgan edi.
O'shandan keyin ancha vaqt o'tib qo'yganini his qilishingiz uchun bazi faktlarni keltiramiz:
U paytlar Timur Kapadze butsalarini mixga ilmagan edi.
SHota Toshkentga kelmagan, "Paxtakor"ni Jasur Abduraimov boshqarar edi.
Mirjalol Qosimov, Murod Aliev va Mirzahakim To'xtamirzaev "Bunyodkor"da edi.
Eldorning 4 yildan keyin "Roma"ga o'tishini hech kim tasavvur qila olmasdi.
Abramov "Neftchi"ni boshqarar edi.
Samvel Babayan terma jamoada ishlardi.
Geynrix, Jeparov hamda Lobanov milliy jamoa vakillari edi.
Oliy ligada "Obod" degan jamoa bor edi.
O'FA birinchi vice-prezidenti Rossiyadagi mundialga tayyorlanayotgandi.
Diyor Imomxo'jaev hali jurnalist edi.
O'zbekistonda "Lokomotiv" gegemon edi...
Obuna bo'ling → FA| futbol ANALIZI
Bosh sahifaga
87
