Dastlab mavsumni Predrag Rogan murabbiyligida boshlagan samarqandliklar bir qator o'yinlarda qoniqarsiz natijalar qayd etdi. Yakunda serbiyalik murabbiyga chiqish eshiklari ko'rsatildi. Uning o'rniga tayinlangan Andrey SHipilov ham uzoqqa borgani yo'q. Xo'sh, mag'lubiyatlarda murabbiylar qo'nimsizligiga bog'liqmi? Saytimiz muxbiri Abdulaziz Iskandarov bilan suhbatda bo'lgan jamoa yarim himoyachisi Evgeniy CHumak batafsil izoh berdi.
- Evgeniy ayni paytda jamoaning kayfiyati qanday? Oldindagi uchrashuvlarga tayyorgarlik qanday ketyapti?
- Jamoaning kayfiyatini juda zo'r, deb bo'lmaydi. Turnir jadvalining oxirgi o'rinida ketmoqdamiz. Lekin imkoniyatimiz bor ekan oxirigacha kurashamiz. Vaziyatni to'g'rilash uchun bor kuchni sarf qilamiz.
- "Dinamo" "Paxtakor" bilan ko'rsatgan o'yinining "Nasaf" bilan kechgan bahsda yarimini ham ko'rsata olgani yo'q. Toshkentdagi bellashuvda futbolchilar taktik tomondan to'g'ri harakat qilgandi. Xo'sh, nima bo'ldi?
- Siz mutlaqo haqsiz. "Paxtakor" bilan bu mavsumdagi eng yaxshi o'yinimizni namoyish qildik. O'yin suratini olib qarasangiz ham raqibdan qolishganimiz yo'q. Jarima maydonchamizga qamalib olish yoki vaqt cho'zmadik. "Nasaf"ga qarshi uchrashuvda 2ta juda qo'pol xato qimmatga tushdi. Birinchi bo'limning o'zidayoq o'yinimizni yo'qotib qo'ydik, deb o'ylayman. Ikkinchi bo'limga katta xohish bilan chiqdik. Afsuski, uchinchi gol o'yinga nuqta qo'ydi. Mazkur uchrashuvda Yovanovich, Baydullaev, Bikmaevning yo'qligi bilindi. Bu katta va sezilarli yo'qotish. Bu futbolchilar maydonda bo'lgan avvalgi turda qanday o'yin ko'rsatganimizni solishtirib ko'ring.
- Bu mag'lubiyatdan so'ng Andrey SHipilov istefoga chiqdi...
- Andrey Sergeevich joyini ushlab o'tirmadi va erkaklarga hos qaror qabul qildi. Omadsizliklarda murabbiylar shtabi yoki rahbariyatni aybdor sifatida ko'rsatish xato. Hammasi o'zimizga bog'liq. Futbolchilar maydonga chiqib murabbiyning ko'rsatmalarini bajarmasa ayb yana murabbiyda bo'lishi kerakmi? Yana qaytaraman o'zimizga bog'liq.
- Klubda moliyaviy jihatdan muammolar kuzatilayotgani yo'qmi?
- Bu taraflama umuman muammo yo'q. Klub homiylariga minnatdorchilik bildiraman. Yuqorida ham aytdim muammo o'zimizda. Biz o'zimizga ishonishimiz va hech qanday raqibdan qo'rqmasligimiz zarur. Maydonga chiqib yaxshi o'yinlarimizni ko'rsatishimiz va oldinga harakat qilishimiz kerak. Boshqa yo'limiz qolmagan.
- Vadim Abramov siz uchun begona emas. O'z vaqtida "Bunyodkor"da uning qo'l ostida bir davra to'p tepgansiz. Boshqalarga qaraganda sizda uni tushunish osonroq bo'ladi...
- To'g'ri aytdingiz. Vadim Abramovning mashg'ulotlardagi talablari, futbolga munosabati umuman boshqacha. Qisqa vaqt ichida murabbiyning ko'rsatmalarini o'zlashtirishimiz talab qilinadi. SHundagina biz hozirgi qiyin vaziyatdan chiqib ketishimiz mumkin.
Bosh sahifaga
223