Bugun sizlarni Mikel Artetaning "Arsenal"dagi assistentlaridan biri Karlos Kuesta bilan tanishtirmoqchimiz.
Uning shtabdagi vazifasi – futbolchilarning individual rivojlanishini taminlash.
Karlos 27 yoshda. U allaqachon Pro licenziyasi va ajoyib rezyumega ega, jumladan, u "Atletiko", "Yuventus" va "Arsenal"da ishlagani bilan maqtana oladi. SHuningdek, u oltita (!) tilda so'zlashadi: ingliz, ispan, italyan, portugal, francuz va katalon. Bu Kuestaga juda qo'l keladi, chunki u futbolchilar bilan yakka tartibda ishlaydi, odatda asosiy mashg'ulotdan keyin.
Uning mashg'ulotlarida yuklamalar berilmaydi, aksincha, texnik ko'nikmalar va taktik ishlanmalarni rivojlantirishga etibor qaratiladi. Har bir jarayon asosiy mashg'ulot kabi videoga yozib olinadi. Kuesta har bir o'yinchi bilan videotahlilni ko'rib chiqib, unga alohida vaqt ajratadi.
Kuesta birinchi bosqichda o'yinchining jismoniy imkoniyatlari, texnik, aqliy va boshqa ko'nikmalarini hisobga olgan holda charm to'p ustasining nimalarga qodirligini aniqlaydi. Bu har bir shaxs bilan qaysi yo'nalishda va qanday ishlashni tushunishga imkon beradi. SHuning uchun yosh mutaxassis murabbiylar shtabidagi barcha mutaxassislar bilan muloqotda bo'lishi muhim.
Ispaniyalik murabbiylik faoliyatini 18 yoshida "Atletiko" U-13 jamoasi murabbiyi sifatida boshlagan. SHu bilan birga, u Portu universitetida "taktik davriylashtirish"ning otasi, ko'pchilikka, jumladan, Joze Mourinyuga katta tasir ko'rsatgan afsonaviy Vitor Fradedan tahsil olgan.
Kuesta 2018 yilgi turnirda italiyalik murabbiylardan biri bilan tanishib qolib, "Yuventus"ga yo'l oladi. Karlos Turin klubi boshliqlarini shunday hayratda qoldirganki, ular unga doimiy ish va lavozim taklif qilishgan. Ispaniyalik u erda U-17 jamoasida yordamchi murabbiy bo'lib ishlagan va U-23 da ham tajriba orttirgan. U ikki yil muddatni Italiyada o'tkazgan.
Turinga ko'chib o'tishdan biroz oldin Karlos "Siti" faoliyati bilan tanishib chiqqan. U "shaharliklar"ga ularning hujumkor o'yinlarini batafsil tahlil qilib bergach, klubdan taklif olgan. U "Siti"da Arteta yaxshi mutaxassis ekanligiga ishonch hosil qilgan va o'shanda Mikelning yonida amaliyot qilish o'ziga xos voqelik bo'lganini alohida takidlab o'tgan.
O'z o'rnida Mikel ham hamyurtini unutmadi. Arteta o'tgan yozda uni o'z shtabiga taklif qildi.
Hozirgi vaqtda Kuesta Evropadagi eng yorqin va istiqbolli murabbiylardan biri sifatida qaralmoqda. "To'pchilar" Arteta va uning shtabi, xususan, Kuestaning usullari "Arsenal"ga sovrin olib kelishiga har qachongidan ko'proq ishonishmoqda.
SHerzod Nurmatov tarjimasi
Bosh sahifaga
132