- Birinchidan, jamoamizni, muxlislarni g'alaba bilan tabriklayman. O'yin juda bosimli bo'ldi. SHunday o'yin bo'lishini kutgandik va shunga yarasha tayyorlangandik. Extimoliy qo'shimcha bo'limlarga ham tayyor edik. Murabbiylar bilan ko'p jihatlarni muhokama qildik. Ha, balki penaltilardan yutgandirmiz, biroq g'alabamiz adolatli bo'ldi deya olaman. Bunday o'yin bilan yutishimiz shart edi. Yana bir bor aytaman, "Bunyodkor" ham kuchli o'ynadi, oxirigacha kurashdi. Ular ham maqtovga loyiq. Bunday o'yindan keyin hissiyotlar ham tugab qoladi. Ichimdagi barcha g'uborlar chiqib ketdi.
- Bugungi o'yin statistikasida "Lokomotiv" ham zarbalar, to'pni ushlab turish, umuman barcha jihatlar bo'yicha raqibdan ustunlik qildi. Garchi hisob 2:2 bo'lgan bo'lsa-da, o'yin bobida raqibdan ustunlik qildik, deya olasizmi?
- "Bunyodkor" ham qattiq harakat qildi. Fikrimcha, adolatli yutdik. Men shunday ko'rdim, biz raqibdan kuchli o'ynadik.
- Mo'min Melievning tushirilmasligi, Jasur Jaloliddinovning zaxirada qoldirilishi, umuman shu kabi jihatlar Sizning qaroringizmi yoki boshqa sabablar bormi?
- Avvalo bu mening qarorim. SHuningdek, Mo'min Melievda kichik jarohat bor, uni xavf ostiga qo'ymadik. 7 kundan keyin "Nasaf" bilan og'ir o'yin bor, bizga hujumchi kerak. SHu sababli u bugun o'ynamadi. Jasur Jaloliddinovning zaxirada qoldirilishi esa taktik yurish edi, ikkinchi bo'limda u orqali o'yinni kuchaytirishni niyat qilgandik. Menimcha u yaxshi harakat qildi.
- Anvarjon Alijonovning o'yiniga qanday baho berasiz?
- Juda yaxshi. Ko'p mehnat qildi. Bugun ikkinchi marta asosiy tarkibda maydonga tushdi. U hali juda iqtidorli ekanligini ko'rsatadi.
- Penaltilar seriyasining so'nggi zarbasini Jasur Jaloliddinov tepganiga nima deysiz? O'tgan haftada u penaltidan ura olmagandi.
- Matbuot anjumanida aytgandim, keyingi o'yinda penaltini uradi deb. Mana u urdi ham (kuladi).
Bosh sahifaga
67