Futbolchimiz Bahrayn 1-ligasi ishtirokchisi “Ittihod Al Rif” bilan shartnoma imzoladi. SHundan keyin u saytimiz uchun dastlabki fikrlarini bildirib o'tdi.
- Mirzohid, yangi jamoaga o'tishingiz qay tariqa amalga oshdi?
- Hammasi oddiy kechdi. Deylik, “Ittihod Al Rif” jamoasini bosh murabbiyi Facebook ijtimoiy tarmog'imda do'stlarim orasida bor ekan. Menga aloqaga chiqdi. Natijada men taklifni meni agentim orqali hal qilish kerakligini aytdim. SHundan kelishuv agentim va bosh murabbiy bilan hal qilindi.
- Jamoa bilan qancha muddatli shartnoma imzoladingiz?
- Bilasizmi, jamoa boshida menga 3 yillik shartnoma taklif qildi. Biroq men va agentim kelishgan holda bunga rozilik bermadik. CHunki bu men uchun yangi mamlakat, u erdagi futbolni bilmay turib, rozi bo'lishim to'g'ri emasdi. Natijada, 1+1 shakldagi kelishuvga imzo chekdim.
- Bayhranning quyi ligasidan taklif bo'lganida, sizda ikkilanish bo'lgani yo'qmi?
- To'g'risi, menda ikkilanish bo'lgani yo'q. CHunki murabbiy menga jamoadagi barcha shart-sharoitlani videoga hamda suratlarga olib yubordi. SHu orqali klubdan yaqindan tanishdim.
- Klubning qaysi jihati sizni qiziqtira oldi?
- Meni jamoadan ko'ra, ko'proq mamlakat futboli qiziqtirdi. CHunki arab mamlakatlarida futbolga bo'lgan etibor boshqacha. SHu sababli taklif ustida boshqotirib o'tirmadim.
- Jamoa o'z oldiga qanday maqsad qo'ygan?
- Asosiy maqsad jamoani Premer-ligaga olib chiqish hisoblanadi. Qolaversa, Bahrain King Cup'da ham g'olib chiqishni rejalashtirganmiz.
- Qanday sharoitlar yaratib berildi? Qolaversa, yaxshi maosh taklif qilganmi?
- Klub tomonidan kvartira hamda mashina berishgan. Ochigini aytadigan bo'lsam, pul masalasiga u qadar katta etibor qaratmadim. Asosiy maqsadim kelgusida faoliyatim Bahrayn Premer-liga klubida davom ettirish hisoblanadi. SHu jihatlariga katta ahamiyat berib, darhol taklifga rozilik bildirdim.
- Malumotlarga qaraganda, bu erga kelganingizdan keyin darhol Premer-liga klubidan taklif bo'lgan.
- CHindan ham taklif bo'ldi. Nazorat uchrashuvidan keyin “Al Budaiya” klubidan taklif bo'ldi. Afsuski tomonlar transfer masalasida kelisha olishmadi. Xudo xohlasa, ishlashda davom etaman va asosiy maqsadimga erishmoqchiman.
- Bu sizning faoliyatingizda oldinga tashlagan qadammi?
- To'g'risi boshida ortga tashlangan qadam deb o'yladim. Bahraynga etib kelganimdan keyin sharoitlarni ko'rib, bu fikr noto'g'ri ekanini his qildim. CHunki biz o'rtoqlik uchrashuvlarini deyarli hammasini Premer-liga jamoalariga qarshi o'tkazdik. Xususan OFK kubogi finalida “Nasaf”ni 3:0 hisobida mag'lubiyatga uchratgan “Al Muharraq”ga qarshi o'ynadik. Bellashuv 2:2 hisobida yakunlandi. Bu ham menga qo'shimcha kuch bag'ishladi.
Bosh sahifaga
200