- Nima ham derdim, yomon o'ynayapmiz, shu bois natijalarimiz ham yaxshi emas. Birinchi bo'limni juda ham yomon o'tkazdik, shunga qaramay gol kiritib, hisobda oldinga chiqdik. Ikkinchi bo'limda esa yo'q joydan gol o'tkazayapmiz. Agar yaratilgan vaziyatlarimizdan foydalana olganimizda, ehtimol o'yin boshqacha kechardi. Hozirgi vaziyatda o'yin jihatdan ham yomon ko'rinayapmiz.
- Ikkinchi bo'lim ko'rsatdiki, «Dinamo» jismonan yomon ahvolda. Bu fikrga qo'shilasizmi yoki bizga shunday ko'rindimi?
- SHubhasiz, fikringizga qo'shilaman. SHu sababli ham biz so'nggi o'rindamiz. Statistikani alday olmaysan. Hammadan kam gol kiritib, hammadan ko'p gol o'tkazib yuborganmiz.
Jamoada uchinchi o'yinimni o'tkazyapman va uchinchi o'yindirki darvozamiz tomon penalti qo'yilmoqda. Vaziyatlarda o'zimizga ishonmay, xatolarga yo'l qo'yib, jarima maydoni ichida o'yin qoidasini buzayapmiz va o'z darvozamizga penalti olib kelyapmiz.
- Jamoada ish boshlashdan avval vaziyatni tahlil qilgansiz, qanday tavakkalga qo'l urayotganingizni bilgansiz. Buyog'iga hozirgi vaziyatdan qanday chiqib ketmoqchisiz?
- Buni vaqt ko'rsatadi. Jamoani ligada olib qolish imkoniyati paydo bo'lishi uchun kamida 5ta o'yinda g'alaba qozonishimiz kerak. Ammo biz qo'l ostimdagi dastlabki uch o'yinda mag'lub bo'ldik. Oldinda 9ta o'yin qoldi. Hozircha oldinda yorug'lik ko'rinmayapti, ko'ramiz.
- Bugun gol muallifiga aylangan SHohrux Abdurahmonovning o'yinini qanday baholaysiz?
- SHohrux – umidli futbolchi, ammo unutmaslik lozimki har bir futbolchi ham jamoaviy o'yindan kelib chiqib, o'ynaydi. Faqat bir kishi maydonda jang qila olmaydi. Bizda hali jamoaviy o'yin yo'q. Afsuski, yigitlar maydonda katta hajmdagi ishni bajarishmoqda, ammo yugurish shart bo'lmagan, shunchaki aql bilan ish ko'rish lozim bo'lgan joyda bunday qila olishmayapti. SHunga achinaman. To'pni olgach ham, maydonda ochilib, bir-birimizga yordam bermayapmiz. Futbol bunday o'ynalmaydi, axir.
- «Dinamo» qo'l ostingizdagi 3ta o'yinda ham maydonda birinchi raqamli jamoa bo'lib o'ynashga intildi, hattoki «So'g'diyona»ga qarshi bahsda ham. Odatiy taktikangizga qarshi borib, himoyadan o'ynash haqida o'ylamayapsizmi?
- Albatta, himoyadan ham o'ynash mumkin, agar sizda himoyachilar etarlicha bo'lsa. Ammo bizda kimlar himoyada o'ynayotganiga qarang. Mana bugun ham 1:0 hisobida oldinda borayotganda, oldinga yuguring deganimiz yo'q, aksincha himoyadan o'ynab, qarshi hujumda o'ynash talab etilgandi. Mana, himoyadan o'ynashga qaror qildik va 5 daqiqa ichida ikkita gol o'tkazib yubordik. Bu nimadan dalolat? Ko'ramiz, oldinda nima bo'lishini vaqt ko'rsatadi.
Bosh sahifaga
142