Ulug'bek Baqoev dastlabki bo'limda SHohruz Norxonov, Jasur Hasanov va Javohir Qahramonov singari etakchilarga dam berishga qaror qildi. SHu tufayli bo'lsa kerak, o'yin boshidan tashabbus mehmonlar tomonga o'tib ketdi. Aniqroq aytsak, dastlabki bo'lim Asad Sobirjonovning foydalanolmagan imkoniyatiyu hisoblanmagan goli, Diyorjon Turopovning darvoza to'sinini poylashi va Jokichning darvozagacha bormagan zarbasi bilan esda qoldi.
2-taymda "So'g'diyona" etakchilarining maydonga tushishi bilan mezbonlar g'alabani ilib ketishga yaqin kelishdi. Norxonov bilan Hasanov manziliga yo'llangan uzun paslar "Navbahor" jarima maydonida sarosima yuzaga keltirdi. Qahramonovning burchakdan yo'llagan zarbasi golga aylanishiga oz qoldi. Oxirgi vaziyatda Jo'rabekov mehmonlar darvozasi oldidagi Nasriddinovni "ko'rsa", Daniel o'zini alam bilan erga otish o'rniga xursandchilikdan osmonga sakrashi mumkin edi.
Darvozabonlarning mahorati va foydalanilmagan vaziyatlar yashil maydonda do'stlik g'alaba qilishini taminladi.
Ammo...
Stadion tashqarisidagi voqealar haqida bunday fikr yuritib bo'lmaydi. Mahalliy muxlis matbuot anjumaniga kirish oldidan Samvel Babayanni haqorat qildi. O'sha nuqtada kichik janjal yuzaga kelib, ishqibozni xavfsizlik xizmati xodimlari olib ketishdi. Bu voqealarni tasvirga olib turgan Championat.asia muxbiriga 3 kishi (klub rasmiysi, boshqa rasmiyning qo'riqchisi, namanganlik "jurnalist") hujum qilib, uning shaxsiy (!) telefonida "tozalash ishlarini" o'tkazdi.
Biz shaharning darvozasi qaerdaligini unutib qo'ygan shaxslar masalasini boshqa joyda hal qilamiz. Lekin shu joyida PFL va O'FA manziliga kichkina savol tug'ilyapti:
1) Matbuot anjumanlaridagi provakacion harakatlari bilan "otning qashqasi"ga aylangan, bungacha bir necha bor jiddiy tarzda ogohlantirilgan, o'z vazifasini bajarayotgan hamkasbiga tashlanishdan ham tap tortmaydigan namanganlik "jurnalist"ning akkreditaciyasi bundan keyin ham faol bo'lib qolaveradimi?
2) Klub rasmiylarining ishi qo'mitada ham ko'rib chiqiladimi?
Bosh sahifaga
178