Mazkur o'yin afishasi o'zgacha qiymatga ega. Ammo bu ikki jamoaning oxirgi 4 yillikdagi o'zaro o'yinlariga nazar solinsa, afisha biroz suniy ravishda kattalashtirilganga ham o'xshaydi.
CHunki AGMK Qosimov jamoaga kelganidan buyon biror marta ham "Paxtakor"ni yutmagan. "Paxtakor" esa oxirgi 4 yillikda O'zbekistonda eng ko'p AGMKni mag'lub etmoqda. AGMK so'nggi 4 yillikda "Paxtakor"ga jami 9 marotaba yutqazishga ulgurdi. Bunday raqamli mag'lubiyatlardan keyin bugungi o'yin afishasida favorit yaqqol aniqqa o'xshab ko'rinishi mumkin.
Biz saytimizda tahliliy fikr-mulohazalarini berib borayotgan sobiq futbolchi, Mundial tahallusi nomida chiqish qilayotgan mutaxassisga mazkur o'yin oldi fikrlarini bayon qilishini so'radik.
"Ochig'i, bu o'yinda "Paxtakor" har taraflama ustunlikka ega. Jamoa jadvalda ham, o'yin taraflama ham AGMKdan yuqorida. Qosimov AGMK jamoasi bilan haligacha "Paxtakor"ni yutmagani juda achinarli holat. Bu jamoaning ruhiyatiga ham tasir qiladi. Mirjalol Qosimovdek murabbiy uchun bu yarashmaydigan holat. "Paxtakor" hozir AGMKdan yuqorida joylashgan bo'lsada, bu jihat o'yinga katta tasir qilmasligi mumkin. CHunki "Paxtakor"ning ham muammolari ko'paygan, ular avvalgidek raqobatdan xoli bo'ladigan darajada qudratli emas va jamoa bosim ostida qolgan. Yil davomida rahbariyat va murabbiylar shtabida qator o'zgarishlar bo'layotgani ham jamoaga katta tasir qildi. SHackix esa hozircha engilmas jamoani tuzganicha yo'q. Bu jihatlarni hisobga olsak, AGMK endi ham "Paxtakor"ni yutish yo'llarini topa olmasa, unda qachon yutadi? degan o'rinli savol tug'ilishi mumkin. Bu jamoalarning o'zaro o'yinlaridagi noxush seriyani bir chetga qo'yib, bu yilgi mavsumdagi maqsadlardan kelib chiqilsa ham, AGMK uchun bu ikki karra ahamiyatli o'yin. Bu turda jamoa raqobatchisiga yutqazsa, unda batamom chempionlik yoki medallar uchun kurashdan kurashsiz chiqadi. Agarda AGMK bugun yutsa, unda ularda qandaydir umid va imkoniyatlar paydo bo'ladi. Jamoa oxirgi 4 yilda har taraflama barqarorlikka erishdi, moliyaviy muammo yo'q, tarkib murabbiylar istagi bo'yicha saqlanib, kuchaytirilgan. Ammo AGMK haligacha chempionlik uchun jiddiy kurash taqdim etmayotgani Qosimovning murabbiylik imijiga katta putur etkazmoqda. Bu yil esa AGMKga savollar ko'payishi mumkin. Masalan, "Paxtakor"da ketma-ket 2 yildan buyon o'zgarishlar, istefolar kuzatilsa-da, jamoa chempionlik uchun asosiy davogarligicha qolmoqda. "Navbahor" bu yil tamoman o'zgardi, tarkib 90% ga yangilandi va Babayan birinchi mavsumidayoq chempionlik uchun kurashmoqda, AGMKdan tepada. Bu jihatlarni bejiz aytmadim, chunki bu turda AGMK ushbu mavsumni qutqarib qolishi uchun ham "Paxtakor"dan 3 ochko olishga majbur. Aks holda, olmaliqliklar uchun Superliga qiziqishi muddatidan oldin yo'qoladi. Bu yilgi ajoyib o'tayotgan mavsum AGMKning medallar uchun kurashdan muddatidan avval chiqib ketishi natijasida buzilishini ko'pchilik istamaydi. Qosimov va SHackixning murabbiylikdagi o'zaro debyut bahsi qanday kechishini kuzatish qiziq bo'ladi. Bosim har ikkala jamoada ham teng. AGMK uchun bu bahsni finalga qiyoslagan bo'lsam, "Paxtakor" ham istalgan ehtimoliy ochko yo'qotilishi natijasida chempionlik poygasida azaliy raqiblari "Navbahor" va "Nasaf"ni oldinga qo'yib yuborishi mumkin. Buni esa toshkentlik futbol muxlislari aslo kechirishmaydi. Gapni indallosi, juda qiziq va tajovuzkor o'yin bo'lishini kutyapman. Kichik finalga teng o'yin".
Bosh sahifaga
183