Garchi bu o'yinlar vakillarimiz uchun norasmiy maqomda o'tayotgan bo'lsada, terma jamoamiz futbolchilari har bir bahsda borlarini berishayotganini ko'rinib turibdi. Kecha guruhdagi kuchli raqib, mezbon Saudiya Arabistoni U-20 terma jamoasiga qarshi maydonga chiqqan hamyurtlarimiz 2:1 hisobida g'alaba qozondi. Rian Islomovning so'nggi daqiqalarda urgan goli g'alaba keltirdi. O'yindan so'ng uning fikrlari bilan qiziqdik.
- Rian dastlab uchrashuvdan keyingi hissiyotlar, taassurotlar bilan o'rtoqlashsangiz...
- Bizni qo'llab-quvvatlab turgan barchaga rahmat aytib qolaman. Taassurotlar albatta ajoyib. Boshqacha bo'lishi mumkin emas. Qiyin o'yinda bir oila ekanligimiz o'z so'zini aytdi. Goldan keyin ham diqqatni yo'qotmadik. Oxirigacha kurashdik.
- Sizni 2019 yildan beri bilaman. O'sha yili Toshkentda o'tgan U-16 Osiyo chemonati saralash bosqichining so'nggi o'yinida Hindistonga so'nggi daqiqalarda gol urib mag'lubiyatdan qutqarib qolgansiz. Qizig'i bu safar ham saralashda, so'nggi daqiqalarda hal qiluvi golga mualliflik qildingiz. Bu shunchaki tasodifmi?
- Ochig'i nima deyishga ham xayronman. Esingizda ekan, qoyilman (kuladi). Ikki o'yinda ham muhimi jamoamizda katta xohish bor edi.
- Saudiya Arabistonidagi turnirda raqiblar o'rtasida katta farq bor. Bu o'yinga tayyorgarlik jarayoniga tasir qilyaptimi?
- To'g'ri aytdingiz. Raqiblar orasida tafovut juda katta. Deylik Maldiv kabi terma jamoalar bilan bahslarda bu bilindi. Har bir yaratgan vaziyatimizni gol bilan yakunladik. Myanmarga esa yana 3ta gol urishimiz mumkin edi.
- Hakamlik qanday o'tyapti?
- Fikrimcha, adolatli tarzda o'tmoqda.
Abdulaziz Iskandarov suhbatlashdi
Bosh sahifaga
172