Mavsum hal qiluvchi pallaga kirishi bilan chempionatdagi jamoalar sonini ko'paytirish g'oyasi takror tug'ilaveradi. CHo'kayotgan odam xasga yopishganidek, raqobatda yutqazib qo'yganlar ligadagi o'rnini turli yo'llar bilan saqlashga urinadi. Kimdir "tank"larini faollashtirsa, kim OAV orqali jamoatchilik yordamini olmoqchi bo'ladi. Masalan, shu chempionatda muxlislari yozgan xat tufayli elitada qolgan jamoa bor...
Bu safargi tashabbus g'alati eshitilsa ham, chempionlik uchun kurashayotgan "Navbahor" ustozidan chiqdi. Uni futbolimiz afsonasi qo'llab-quvvatlagan. Babayan yoki Qosimovga shu mavzuda savol berilsa, futbol rivoji, yigitlarning jismoniy holatini kuchaytirish to'g'risidagi tasirli javoblar yangrashi aniq.
Xolis qaralsa, bunaqa tashabbusdan grandlarning maqsadi juda sodda bo'ladi: jamoalarning 16taga etishi kuchsiz raqiblar va g'alabali o'yinlar sonini ko'paytiradi (bu yanada ko'proq "premiya" degani). SHu xolos.
Nisbatan qiyinroq vaziyatda turgan Vadim Abramov esa o'zgarishdan milliy jamoa yutishini aytibdi. Quloqqa yoqadigan, ayni paytda tasirli javob.
Ammo terma jamoadan shaxsiy manfaatlari yo'lida, o'z mijozlarini xalqaro maydonda reklama qilish vositasi sifatida foydalangan mutaxassislarni ko'rganimiz uchun aytamaniz: Karlenovich etiborini ko'proq "Dinamo"ga qaratgani maqul. Hozircha samarqandliklar tarkibida Katanec jamoasi uchun bitta ham nomzod yo'q. SHu tufayli chempionatning asosiy autsayderi tomonidan aytiladigan istalgan gap bahonaga aylanib ketadi.
Aslida Karlenovichning mavzu bo'yicha fikrlari ko'pchilik uchun qiziq. CHunki mazkur qadamning termamiz uchun foydali bo'lishini aytayotgan mutaxassis o'z vaqtida Oliy Ligada klublar sonini kamaytirish tashabbusi bilan chiqqan edi (2008 yil).
2017 yil Abramov boshchiligida quyi ligaga yo'l olgan "Neftchi" sport principlariga zid ravishda keyingi mavsumni ham elitada boshlagani yodimizda. 1 yildan keyin "Surxon" va "Dinamo" ham shu tarzda Superligaga chiqib qoldi. Oliy hakam esa adolatsiz qarorlar hech kimga foyda keltirmasligini isbotlab berdi.
Sport principining buzilishi har qaysi holatda bizning zararimizga ishlaydi. Ko'pchilik Pro ligadagi raqobatga zarar etishi haqida gapiryapti. Tanganing 2-tomoni ham bor. Pastdan kuchsiz jamoaning chiqishi Superligada maqsadsiz klub, navbatchi o'yinlar sonini ko'paytirishdan boshqasi emas. Bu 2024 yilda hozirgi "Xorazm" yoki "Yangier" darajasidagi klublar elitada paydo bo'lishini anglatadi. Pro ligada zo'rg'a yurgan jamoa Superligada moliyaviy jihatdan qiynalishi aniq. Iqtisodiy muammolar bor joyda noqonuniy kelishuvlar va totalizator gullashiga 31 yillik tariximiz guvohlik beradi.
SHunday ekan, xayolga kelgan fikrni tilga chiqarishdan oldin yaxshilab sintezlaylik.
Bosh sahifaga
4339