Kataloniyaliklar bosqichma-bosqich o'z rejalarini amalga oshirish rejimiga o'tgan ko'rinadi. Malum qilinishicha, jamoa 2023 yilda ham juda katta transferlarni amalga oshirmoqchi. Quyida mana shular xususida so'z yuritmoqchimiz.
Leo Messi
Oxirgi kunlarda Evropa OAV argentinalik futbolchining "Barselona"ga qaytishi xususida yozmoqda. 35 yoshli futbolchi kelajagi borasida yakuniy qarorni dekabr oyida yakunlanadigan JCH-2022 dan keyin qabul qiladi. O'z navbatida, PSJ ham Messi bilan amaldagi shartnoma muddatini 2024 yilga qadar uzaytirmoqchi. Biroq u "Barselona"ga qaytishi ehtimoli ham yo'q emas.
Bernardu Silva
Kelgusi yilning yozida portugaliyalik futbolchi "Barselona"ga ko'chib o'tishi mumkin. Aslida kataloniyaliklar 2022 yilning o'zidayoq Silvani o'z safiga qo'shib olishni maqsad qilishgandi. Biroq moliyaviy holat va boshqa jihatlar sabab kelishuv amalga oshmagandi. "Diario Sport" vakillarining so'zlariga ko'ra, Silva kelgusi yilda faoliyatini La Ligada davom ettirishi ehtimoli yuqori.
Ruben Nevesh
"Vulverxempton" futbolchisi faoliyatini "Barselona"da davom ettirishi mumkin. Kataloniya klubi tayanch yarim himoyada Serxio Busketsning o'rniga munosib nomzod sifatida 25 yoshli Neveshni ko'rmoqda. Qolaversa, Laporta va futbolchining agenti Jorje Mendesh o'rtasida iliq munosabatlar bor. Bu ham tomonlarning kelishuvga erishishiga asosiy omil bo'lishi mumkin.
Rafael Leau
"Milan"dagi ajoyib o'yinlari bilan Evropaning grand klublari nazariga tushgan Leau ham "Barselona"ning nishonida bo'lib turibdi. Portugaliyalik vinger kelgusi yilda "rossoneri"ni tark etmoqchi. Katta ehtimol bilan faoliyatini "Barselona"da davom ettirishi mumkin.
Florian Virc
"Bayer" klubining 19 yoshli futbolchisiga "Barselona" anchadan beri ko'z tikib kelyapti. Qolaversa, futbolchining o'zi ham kataloniyaliklarning ashaddiy muxlisi ekanini yashirmaydi. Biroq nemis klubi Virc transferini 150 million evroga baholamoqda. Ammo futbolchi jiddiy jarohat oldi. Uning safdan chiqqanini hisobga olsak, transfer qiymati bir muncha pasayishi ehtimoli bor.
Joau Feliks
Laporta orzusidagi futbochilardan biri sifatida Feliks tilga olinmoqda. 22 yoshli futbolchi "Atletiko"da o'ynamoqda va yaqin orada jamoasini tark etish niyatida emasligini bir necha marotaba takidlagan. Lekin Mendesh aralashuvi yuzaga kelsa, kelishuv amalga oshishi mumkin. Biroq Feliksning transfer qiymati yuqori ekani bois "Barselona" biroz qiyinchilikka duch kelishi ham mumkin. Har holda moliyaviy tomonlama qiynalayotgan "ko'k-anorranglilar" portugaliyalik futbolchi uchun 100 million evrodan oshiq sarflashi dargumon.
Samandarbek tayyorladi
Bosh sahifaga
3789