Garchi markaziy maqomni olmagan bo'lsada, bu o'yinni ham tomosha qilishga etarlicha omillar topilishi shubhasiz.
 Bunyodkor | Superliga. 20-tur 01/10/2022, 18:30 - : - Boshlanmadi |  Navbahor |
"LOCHINLAR" IKKINCHI DAVRADA MAG'LUBIYATSIZ ODIMLAMOQDA
Namangan shahri jamoasi Superliganing ikkinchi davrasida hali mag'lubiyatga uchragani yo'q. Bu borada klubning ligadagi mag'lubiyatsiz seriyasi 14ta uchrashuvga etdi. Ular so'nggi bor Superliganing 5-turida o'z maydonlarida "So'g'diyona"ga imkoniyatni boy berishgandi (1:2).
TURNIR JADVALIDA "NAVBAHOR" BIRINCHI O'RINGA QAYTADIMI?
"Bunyodkor" joriy yilda o'zining eng yomon natijasini qayd etmoqda. 19-turdan so'ng 10 o'rinda ketayotgan jamoa uchun ayni paytda g'alaba juda zarur. Aks holda xavfli zonaga yaqinlashishi ham hech gap emas. 12-o'rinda ketayotgan "Qo'qon-1912" bilan oradagi farq 4 ochkoni tashkil qiladi. G'alaba qozonilgan taqdirda nisbatan olib qaralganda 8-o'ringa ko'tarilish imkoni bor. Buning uchun klub bu turda "Olimpik" va "Neftchi"ning "qoqilishi"ni kutishi kerak. Albatta bu hozircha taxminiy bildirilayotgan fikr. "Navbahor" Toshkentga kelib bir o'q bilan ikki quyonni urib ketishi mumkin. Ayni paytda klub "Paxtakor" va "Nasaf"dan bir ochkoga ortda qolmoqda. Ertangi o'yinda ikki jamoadan biri ochko yo'qotishini hisobga olsak, bugun qo'lga kiritiladigan 3 ochko va jami 40 ochko bilan kamida bir pog'ona yuqorilaydi. Bordi-yu, raqiblari o'zaro durangga imzo cheksa, peshqadam bo'lib olishi hech gap emas.
YO'QOTISHLAR
Himoyachi Davronjon Ergashev va yarim himoyachi Suhrob Izzatov bugun "Bunyodkor"ga yordam bera olmaydi. Jarohatidan tuzalgan Farruh Ikromov mashg'ulotlar orqali jismoniy holatini yaxshilashga harakat qilmoqda. "Navbahor" himoyachisi Rustam Ashurmatov O'zbekiston terma jamoasi safida Kamerunga qarshi uchrashuvda jarohat olgan, Kosta-Rikaga qarshi o'yinni o'tkazib yuborgandi. Bilishimizga qaraganla, futbolchi jarohatidan forig' bo'lgan. U bugun maydonga tushishi kutilyapti.
JAMOALAR 8 YILDAN SO'NG YANA "JAR" STADIONIDA UCHRASHMOQDA
"Qaldirg'ochlar" o'z maydonlaridagi tamirlash ishlari sababli bugun "Navbahor"ni "Jar" stadionida qabul qiladi. Bilasiz, ushbu arena "Bunyodkor" uchun begona hisoblanmaydi. O'z vaqtida jamoa bu maydonda ko'plab g'alabalarni va ajoyib uchrashuvlarni o'tkazgan. "Bunyodkor" va "Navbahor" oradan 8 yil o'tib yana "Jar" stadionida uchrashmoqda.
02.05.2014. Superliga 7-tur
Toshkent. "Jar" stadioni, 2476 tomoshabin
"Bunyodkor" - "Navbahor" 3:0
Gollar: Vohid SHodiev, Sardor Rashidov, Oleksandr Pishur
Barchaga yoqimli tomosha tilab qolamiz.
Bosh sahifaga
4014