15 yanvar kuni hamyurtimiz yangi klubi safidagi ilk uchrashuvni ham o'tkazishga ulgurdi. Biz Dostonbek bilan bog'lanib bir qator savollar bilan murojaat qildik.
- "Al Nasr"dan olingan ilk taassurotlar qanday?
- Jamoaga yaqinda kelib qo'shildim. Debyut uchrashuvimni ham o'tkazishga ulgurdim. Taassurotlar ajoyib. SHaroitlar ham alo darajada ekan. Jamoaga moslashish oson kechmoqda.
- Oldingizda yana qaysi klub yoki chempionatlardan taklif bor edi?
- To'g'ri bir qator variantlar bor edi. Biroq aynan qaysi davlat yoki qaysi klubdan takliflar borligidan xabarim yo'q edi. Transferim bilan shug'ullangan akalarim bu malumotlarni menga aytishmadi. "Al Nasr" bilan shartnoma tuzdim va endi bu takliflarni eslashning o'rni emas.
- O'z vaqtida Rossiyaning "Anji" klubida o'ynagansiz, hozir "Al Nasr"da faoliyat olib borayapsiz. Bu jamoalarni taqqoslasak qanday farqlarni ko'rish mumkin?
- SHaroitlarida, o'yin uslubida, chempionatda xullas ko'p jihatlarda juda katta farqlar bor. Har ikkala klubning ham o'ziga yarasha qiziq tomonlari bor.
- "Paxtakor"dagi o'zgarishlarga qanday munosabatdasiz? SHota Arveladze, Jaloliddin Masharipov va siz jamoani tark etdingiz...
- O'ylashimcha juda katta o'zgarish sodir bo'lmadi. Sababi "Paxtakor"da etakchilar juda ko'p edi. Biz jamoaviy o'yin hisobiga g'alabalarga erishardik. To'g'ri bosh murabbiy o'zgarishi jamoaga tasir qilishi tabiiy, chunki u klubga yangi muhit, yangi o'yin uslubi olib kirdi. Lekin uning yordamchisi Piter Xyuistra SHota Arveladze bilan birga ishladi va jamoa haqida juda yaxshi tasavvurga ega. O'ylaymanki jamoa yanada kuchayadi.
- Klub sizga qanday sharoitlar yaratib berdi?
- "Al Nasr" alohida uy berdi, lekin mashina hali bergani yo'q. Sababi Dubay yo'llarini hali yaxshi bilmayman va bu erning haydovchilik guvohnomasini olishim kerak.
- Klubda sizdan oldin o'ng qanotda o'ynagan legioner futbolchi shartnomasi tugab jamoani tark etdi. Qizig'i uning raqami 17 edi. Buni bilarmidingiz?
- "Al Nasr"ga kelishimdan oldin 17-raqam band ekanligini bilardim. O'sha futbolchidan agar xafa bo'lsang boshqa raqamni olaman deb aytdim, ammo legioner futbolchi 17-raqamni olishim mumkinligini sababi shartnomasi tugab jamoadan ketayotganini malum qildi.
- O'tgan yil so'nggida sizga AQSH klublaridan taklif bo'ldi degan xabarlar chiqqandi. SHu xabar rostmidi?
- Ha bu xabar rost edi. Menga qo'ng'iroq qilib shunday variant bor shu transfer ustida ishlasak maylimi deb so'rashdi, rozi bo'lgandim. Yakunda "Al Nasr" variantini tanladim.
- "Al Nasr" va "Paxtakor"dagi maoshni taqqoslasak...
- Bu savolingizni ochiq qoldiraman, bu sir bo'lib qolaqolsin.
- Bosh murabbiy birinchi o'yindan oldin sizga nimalar degani qiziq.
- Murabbiy mening jismoniy holatimdan xabardor edi. Dekabr oyi so'nggida mavsumni tugatganimni bilardi. SHu bois mendan ko'p narsa talab qilgani yo'q. Biroq o'zimda ishtiyoq juda kuchli edi, balki shu uchundir asosiy tarkibda tushirdi. Bosh murabbiy bilan munosabatim ajoyib.
- "Paxtakor" va uning muxlislariga aytar gapingiz bormi?
- "Paxtakor" rahbariyatiga ham berilgan imkoniyat uchun katta rahmat aytaman. Jamoaga ham omad tilayman, Osiyo chempionlar ligasida, Superliga va kubok bahslarida g'olib bo'lishlarini tilayman. Muxlislarga minnatdorchilik bildiraman, doim o'zbek futboli va "Paxtakor"ni qo'llab-quvvatlashlariga tilakdoshman.
Narzulla suhbatlashdi
Bosh sahifaga
272
