Musobaqada 24ta jamoa ichida faxrli uchinchi o'rinni qo'lga kiritib bronza medallariga ega chiqqan hamyurtlarimiz kecha yurtimizga qaytib keldi. Tantanali ravishda kutib olish marosimida Sportni rivojlantirish vaziri Adham Ikramov, O'FA birinchi vice-prezidenti Ravshan Ermatov, bosh kotib Avaz Maksumov va mutasaddilar ishtirok etib terma jamoa azolarini mundialdagi ishtirok bilan samimiy qutladi. SHuningdek, futbolchilarning yaqinlari, OAV va muxlislar ham ajoyib muhit yaratgan holda matonatli qahramonlarni kutib olganini aytish joiz.
Abdujamil SHukurov (O'zbekiston amputantlar terma jamoasi o'ynovchi murabbiyi): - Jahon chempionatida kuchli terma jamoalar yig'ilgandi. SHaxsan o'zimga besh karra Jahon chempioni bo'lish nasib qilgan. Mundialga 100tadan oshiq davlatlar saralashdan o'tdi. 24ta jamoa ichida uchinchi bo'lish yomon natija emas. Yarim finalda mezbon Turkiyaga mag'lub bo'ldik. Muhimi quruq qaytmadik. Agarda finalga chiqqanimizda Angolani yutar edik. Bunga ishonchim komil edi.
Keyingi Jahon chempionatigacha yoshlarimiz etishib chiqishsin. Ular o'sishga erishsin. Xudo xohlasa, prezidentimiz boshchiligida oltinchi marotaba Jahon chempioni bo'lamiz.
Qudrat Hudoyqulov (O'zbekiston amputantlar terma jamoasi futbolchisi) - Kuchli terma jamoalar bilan bellashdik. Turkiya o'zidagi mundialni nimadir qilib bo'lsa ham olishi kerak edi. Bronza medali bilan xalqimizni tabriklaymiz. Jahon chempionati 4 yilda bir marotaba bo'ladi. SHu bois borimizni berdik.
Azizjon Azimov (O'zbekiston amputantlar terma jamoasi futbolchisi) - Turkiyada barchasi yuqori darajada tashkillashtirildi. Gap bo'lishi mumkin emas. Hamma jamoa o'ziga yarasha kuchli edi. Musobaqaning foydali tomoni shunda bo'ldiki, yoshlarimiz tajriba to'plashdi. CHunki ular uchun birinchi Jahon chempionati edi. Keyingi turnirda bronzani oltinga aylantirishni maqsad qildik.
Italiyaga urilgan golga kelsak, o'yin kuni tushlikda egizak farzandli bo'lgan edim. Qo'shaloq bayram bo'ldi. Yigitlar bilan birga nishonladik.
Ulug'bek Toshpo'latov (O'zbekiston amputantlar terma jamoasi futbolchisi) - Faoliyatimdagi ilk Jahon chempionatida qatnashdim. Murabbiylar, ustozlarim ishonch bildirib olib ketishdi. Hali maktab o'quvchisiman. Barcha sharoitlarni yaratib bergan rahbarlarimizga minnatdorchilik bildiraman. Terma jamoamiz bitta oila. Yosh bo'lishimga qaramay o'z tajribalari bilan bo'lishishdi. Kerakli tavsiyalarni berib kelishmoqda.
JCH-2022. O'zbekiston O'zbekiston amputantlar terma jamoasi Gaitini mag'lub etib, uchinchi o'rinni qo'lga kiritdi
Bosh sahifaga
3536