O'yin haqida
- Birinchi navbatda “Andijon” jamoasini g'alaba bilan tabriklayman. Durang natija bo'lganida adolatli bo'lardi. Bunday tajribali jamoaga nisbatan xavfli vaziyatlarni ko'p yarata olmasligimizni bilgandik. Birinchi bo'limda ko'proq himoyalandik. Ikkinchi bo'limda esa hujumga etiborni oshirdik. Taktik jihatdan raqibga qarshi tayyorgarlik ko'rgandik. Yigitlarimiz imkon darajasida o'ynashdi. Lekin tajribamiz etmadi. Birinchi bo'lim oxirlarida biroz muvozanatni yo'qotib qo'ydik. Boz ustiga “Andijon” standartda yaxshi qurollangan. Ularning eng xavfli quroli mana shunda – autlar, burchak va jarima zarbarlaridagi standartlardir. Uchrashuv mobaynida baribir bizga muvozanat etishmadi. Baribir o'yin uchun futbolchilarga rahmat aytdim. Endi keyingi uchrashuvga tayyorgarlik ko'ramiz.
- “Xorazm” jamoasi ikkinchi davrada ijobiy tomonga o'zgarishni boshladi. O'zingiz xohlagan o'yinni yo'lga qo'ya oldingizmi?
- Ha, asta-sekin bo'lyapti. Tarkibni yoshartirganmiz. Mavsum boshiga nisbatan endi kamroq xatolar qilyapmiz. Asta-sekin o'yinchilarimizning tajribalari ortyapti. Futbolda murabbiyga natija qilish uchun uch yil vaqt berish kerak. Dastur bo'yicha ishlashda davom etyapmiz. Rejalarimizni 60-70 foizga amalga oshirishga harakat qilyapmiz.
- “Xorazm” birinchi davrada “Andijon”ni qabul qilib 3:0 hisobida g'alaba qozongandi. Bu safar yutqazdinglar. O'sha uchrashuv bilan taqqoslagan raqib jamoa o'yinida qanday o'zgarishlarni ko'rdingiz?
- Biz ko'proq himoyada o'ynadik. Ikkinchi taymda qarshi hujumlar bo'ldi. Umuman olganda, “Andijon”ning o'yini o'zgarmadi. Bu o'yinga tayyorgarlik ko'rgandik. Futbolchilarga agar birinchi taymda gol o'tkazib yubormasak yutqazmaymiz deb aytgandim. Balki yaratilgan vaziyatlardan foydalanganimizda boshqacha bo'lardi. Afsus, birinchi bo'lim oxirlarida gol o'tkazdik va natija shunday bo'lib qoldi. Ozroq hayajon ham bo'ldi. Yangi stadiondagi birinchi o'yin edi. Afsuski, muxlislarimizni bayram bilan quvontira olmadik. Mayli, kelasi uchrashuvga tayyorgarlik ko'ramiz. O'yinlar davom etadi. “Xorazm” muxlislarini xursand qilamiz.
- Maydon holati haqida fikringiz?
- Maydon chimi alo darajada, 4 baho. Lekin o'zimiz ham bu maydonda kam mashg'ulot qildik. Ikkinchi taymda qanotlar orqali harakat qildik. Bu maydonda endi o'ynayapmiz va hali maydonni sezish u qadar yaxshi emas.
Bosh sahifaga
186