Bugun “Sevinch”ga imkoniyatni boy bergan “So'g'diyona-W” jamoasi chempionlik uchun kurashdan butunlay chiqdi. “Geolog” stadionida o'tgan o'yindan keyin Jizzax klubi hakamlik borasida jiddiy etirozlar bildirdi.
“Championat.asia” vaziyatni o'rganib, bahsli vaziyatlarni tahlil qildi. Quyida saytimizning hakamlik bo'yicha eksperti Ilya Oblomovning epizodlarga munosabati bilan tanishasiz.
1-etiroz: “Sevinch” vakili Laylo Tilavova jarima maydoni ichida to'pga qo'li bilan o'ynagan vaziyatda penalti belgilanmadi.
I.O.: 11 metrli nuqta ko'rsatilmagani to'g'ri. To'p himoyalanayotgan futbolchining qo'liga o'z oyoqlaridan keldi. Bu qoidabuzarlik emas, texnik xato hisoblanadi. FIFA tavsiyalari buzilmagan.
2-etiroz: Diyora Habibullaeva Laylo Tilavova tomonidan yiqitilgan vaziyatda “Sevinch” darvozasi tomon penalti berilmadi.
I.O.: Vaziyatning murakkabligi shundaki, ofsayd kamerasi bo'lmasa, qoidabuzarlik jarima maydoni ichida sodir bo'lganini 100% aytolmaysiz. Bu erda qanot hakami yordamga kelishi kerak.
3-etiroz: To'p “So'g'diyona” vakili Nafisa Nabiqulovaning qo'liga teggan vaziyatda masofa yaqinligiga qaramay, 11 metrli nuqta ko'rsatildi.
I.O.: Kadr yomon, boshqa rakurs kerak. Ammo qo'lning to'pga tomon harakati bor. Bunaqa vaziyatda to'p qo'lga tegsa, penalti belgilanadi. Masofaga qarab o'tirilmaydi.
Xullas, Oblomov 3ta bahsli vaziyatning ikkitasida Najafalievni haq deb topdi. Bir etiroz ofsayd kamerasidan olingan kadr yo'qligi tufayli bo'sh qoldirildi. Quyidagi fotosurat orqali unga o'zingiz baho berishingiz mumkin.
SHundan kelib chiqsak, Asker “So'g'diyona-W”ni “o'ldirdi” deyish xato bo'ladi. Ammo bunga qadar Jizzax klubiga nisbatan chiqarilgan adolatsiz qarorlarni inkor qila olmaymiz. Masalan, ayollar futbolidagi eng tajribali referimiz aynan “So'g'diyona”ning ochko yo'qotishiga sabab bo'lgan qo'pol xatosi tufayli uzoq muddatli diskvalifikaciya oldi...
Xullas, 2021 yilda “Oltin dubl” qayd etib, bu yil Osiyo chempionati g'arbiy mintaqasini yutgan jizzaxlik qizlar ichki maydonda bronza medallar bilan cheklanadiganga o'xshab turishibdi.
Muallifning telegramdagi kanali → FR| futbol ANALIZI
Bosh sahifaga
345