Bir yil oldin O'zbekiston milliy terma jamoasi safida jarohat olib safdan chiqqan Farruh Ikromov kecha "Surxon" bilan uchrashuvning 63-daqiqasida Pavel Mogilevec bilan almashtirildi. O'yin yakunlangach yarim himoyachiga bir nechta savollar bilan yuzlandik.
- Avvalo yashil maydonga qaytganingiz bilan tabriklaymiz. Umuman bu boradagi birinchi hissiyotlar bilan o'rtoqlashsangiz...
- Buni so'z yoki ikki og'iz gap bilan tushuntirish qiyin. Ammo bu kunni kelishini juda kutgandim.
- O'yinga juda yaxshi kirishib ketdingiz. Ko'rinib turibdiki, jismoniy holatingiz chakki emas. Bundan ham ertaroq qaytishingiz mumkinmidi?
- Juda og'ir kunlarni boshimdan o'tkazdim. Buni oila azolarimdan boshqa odam bilmaydi. U kunlar ortda qolganiga xudoga shukur deyman. Jismoniy holatim yaxshi. Bu borada menga katta yordam bergan, "Bunyodkor" klubida ish olib borayotgan fitness murabbiy Dilobar Saydullaevaga katta rahmat aytib qolaman. Meni maydonga qaytishimga mehnati singgan insonlardan biri bo'ladi.
- "Surxon" darvozasiga urgan golingizdan so'ng yuzaga kelgan mojaroni qanday izohlaysiz? O'sha vaziyatni eslasak...
- Bir yil davomida to'p tepmadim. Ortimdan turli gaplar yog'ildi. Gol urdim va ichimdagilarni chiqardim. Biroq hissiyotlarimni "Surxon" muxlislariga ko'rsatmoqchi emasdim. Hissiyotla ostida menga eng yaqin tribuna termizlik muxlislar o'tirgan joy edi. Meni noto'g'ri tushunishmasin. Barchasi hissiyotlar bilan bog'liq. Ulardan uzr so'rab qolaman.
- Jiddiy jarohatdan so'ng aksariyat futbolchilar o'zini ehtiyot qilib, yana qaytalamasligi uchun avaylab o'ynaydi. Natijada to'liq ko'rsatishi, avvalgi darajasiga qaytishi bir muncha qiyin kechadi. SHu jihat sizni havotirga solmayaptimi?
- Fikrimcha, siz o'zbekistonlik futbolchilarni nazarda tutdingiz. Evropada jarohat olgan futbolchini jiddiy ravishda har tomonlama qo'llab-quvvatlashadi. Hech kimga kerakmasdek bo'lib qolmaydi. Jarohati bo'lsa ham hurmat qilishadi. SHuning uchun menda ortiqcha qo'rquv yo'q. CHunki men evropaliklar qo'lidaman.
- Demak tiklanish jarayonlari xorijlik mutaxassislar bilan bo'ldi?
- Jarrohlik amaliyotim Italiyada o'tkazildi. Buning uchun O'FA rahbariyatiga minnatdorchilik bildiraman.
- Bilishimizga qaraganda, Serchko Katanecning shtabida faoliyat yuritayotgan fizioterapevt Ian Katanec bilan Slovakiyada shug'ullandingiz...
- Ha. Buni ham aytib o'tish kerak. Jarrohlik amaliyotidan so'ng son mushaklari uchun Ian Katanec bilan oz fursat tiklanish mashqlarini olib bordim. Qolaversa, oila azolari meni juda iliq kutib olishdi. Ushbu murabbiyga va oilasiga tashakkurimni bildirib qolaman.
Bosh sahifaga
173