Boks. Ruhiy ustunlik - yarim g'alaba. Osiyo chempionati vaqtida terma jamoamiz safida psixolog ham faoliyat olib bormoqda
/ Kiritdi: BestMaster O'qilgan: 111
Yaxshi bilasiz, bugungi kunda sportda nafaqat jismoniy, balki ruhiy tayyorgarlik ham katta ahamiyatga ega.
Shu maqsadda O'zbekiston boks federatsiyasi shu kunlarda Ammanda o'tkazilayotgan Osiyo chempionati vaqtida terma jamoamiz vakillari uchun maxsus psixolog jalb etdi.
Tajribali psixolog, katta tajribaga ega Mufiza Xo'ja Nurilla janglardan oldin va keyin terma jamoamiz bilan ushbu yo'nalishda ish olib bormoqda. Qayd etish lozimki, bunday yirik musobaqalar vaqtida ruhiy tayyorgarlik katta ahamiyat kasb etadi. Shuni inobatga olgan holda, federatsiyamiz mazkur yo'nalishda ham ishlarni yo'lga qo'ygan. Psixolog sportchilar bilan guruh hamda individual tarzda reja asosida suhbatlar tashkil etmoqda. O'z navbatida sportchilar o'zlarini qiziqtirgan savol bilan mutaxassisga murojaat qilish imkoniga ega bo'lishmoqda.
Yodingizda bo'lsa, shu yil may oyida o'tkazilgan ayollar o'rtasidagi jahon chempionati vaqtida ham terma jamoamiz qizlari bilan maxsus psixolog ish olib borgandi. Federatsiya ushbu an'anani davom ettirgan holda, Osiyo chempionati vaqtida ham psixolog yordamidan foydalanishga qaror qilgan.
Ma'lumot uchun, Mufiza Xo'ja Nurilla Botirovna O'zbekiston taekvondo WT assotsiatsiyasida ham samarali faoliyat olib bormoqda. Taekvondochilarimizning muvaffaqiyatida, hususan Tokio Olimpiadasida Ulug'bek Rashitov tomonidan qo'lga kiritilgan oltin medalda ham mutaxassisning xizmatlari ulkan.
Bosh sahifaga
153