Boks. Abdumalik Xalakov ikkinchi «klasiko»ni ham bizning foydamizga hal qilib, Osiyo chempioniga aylandi

Ammandagi boks bo'yicha Osiyo chempionatida bugun erkaklar o'rtasida final janglari boshlandi. Hozirgina O'zbekiston va Qozog'iston sportchilari o'rtasida yana bir "klasiko" bo'lib o'tdi. 57 kg. vaznda vakilimiz Abdumalik Xalakov Serik Temirjanovga qarshi ringga ko'tarildi.

O'ziga xos uslubga ega bo'lgan hamyurtimiz raqibga nisbatan ko'proq aniq zarbalar bergan bo'lsa-da, birinchi raundda hakamlarning 3 nafari qozoq bokschisining ustunligini e'tirof etishdi.

Shundan so'ng Abdumalik tajovuzkorlikni oshirib, aniq va kuchli zarbalar sonini ko'paytirdi. Natijada ikkinchi bo'limda 4 hakam ustunlikni Halakovga berdi va so'nggi raund oldidan o'zbek bokschisi hakamlarning ovozi bo'yicha 2:1 hisobida oldinga o'tib oldi (ikki hakam durang qayd etib turdi).

Xalakov uchinchi raundda ham raqibining erkin harakatlanishiga imkon bermaslikka intildi va o'z maqsadiga erishdi. Yakuniy baholar — 4:1 (30:27, 29:28, 29:28, 29:28, 28:29).

Shu tariqa, Belgraddagi JChda kumush medalni qo'lga kiritgan Abdumalik Xalakov Osiyo chempionatida oltin medalga ega chiqdi.

Teglar: abdumalik, xalakov, ikkinchi, «klasiko»ni, bizning, foydamizga, qilib, osiyo, chempioniga, aylandi,
← OldingaOrqaga →