FIFA va O'FA o'rtasida hamkorlikni yanada rivojlantirish masalalariga bag'ishlangan uchrashuv bo'lib o'tdi

FIFA bosh kotibi Fatma Samura O'zbekiston futbol assotsiatsiyasi rahbariyati bilan uchrashdi. Uchrashuvda FIFA hamda O'FA o'rtasidagi o'zaro ishonchga asoslangan keng qamrovli hamkorlikni yanada rivojlantirish va mustahkamlash yuzasidan fikr almashildi.

Dastlab O'zbekiston futbolida amalga oshirilayotgan islohotlar va o'zgarishlar, qo'lga kiritilayotgan sezilarli yutuqlar haqida so'z yuritildi. Xususan, O'zbekiston bugungi kunda ushbu tashkilot a'zosi sifatida futbolni rivojlantirish, jumladan, hududlarda zamonaviy sport infratuzilmasini yaratish va mavjudini rekonstruktsiya qilish, yosh sportchilarni qo'llab-quvvatlash, ayollar futbolini taraqqiy ettirish, muhim xalqaro musobaqalarni o'tkazish, texnik ko'mak bo'yicha ustuvor loyihalarni amalga oshirishga qaratilgan ko'plab tadbir va dasturlarni amalga oshirib kelmoqda.

O'z o'rnida, FIFA Bosh kotibi O'zbekistonda futbolni targ'ib etish va qo'llab-quvvatlash borasidagi davlat siyosatini yuksak baholadi.

Uchrashuvda, shuningdek, FIFA bilan o'zaro manfaatli hamkorlikni yanada kengaytirish masalalari ko'rib chiqildi. Jumladan, mamlakatimizda FIFA tasnifi bo'yicha yirik xalqaro musobaqalar, xususan, o'smirlar, yoshlar va xotin-qizlar jamoalari o'rtasida jahon va qit'a birinchiliklarini tashkil etish uchun imkoniyatlar mavjudligi qayd etildi.

Tashkilot kelgusida ham O'zbekistonda xalqaro darajadagi futbol infratuzilmasini yaratish, uslubiy ta'minot, iqtidorli yosh futbolchilarni qo'llab-quvvatlash, yuqori malakali mutaxassislar, murabbiylar va hakamlarni tayyorlash bo'yicha ko'mak berishga tayyor ekanligi ma'lum qilindi.

O'FA rahbariyati FIFA bilan yaqin, keng ko'lamli hamkorlik dasturlari va loyihalarini amalga oshirishdan har doim mamnun ekanligini ta'kidlab o'tdi. Fatma Samura FIFA O'zbekiston bilan keng ko'lamli sheriklikni rivojlantirish hamda amaliy hamkorlikka qaratilgan yangi dastur va loyihalarni birgalikda amalga oshirishga tayyorligini ta'kidladi.

Teglar: ortasida, hamkorlikni, yanada, rivojlantirish, masalalariga, bagishlangan, uchrashuv, bolib, otdi,
← OldingaOrqaga →