Qatar-2022. Argentina terma jamoasi va Messi qaerda yashamoqda?
/ Kiritdi: BestMaster O'qilgan: 358
Argentina milliy terma jamoasi payshanba kuni tongida Qatar poytaxti Dohaga etib keldi. Janubiy amerikalik futbolchilar dastlab, Qatar Milliy universitetining yotoqxonasiga joylashgani aytiladi. Messi boshchiligidagi futbolchilarga hech qanday ta'lim kerak emas. Ayniqsa, o'tgan yili Kopa Amerika g'olibiga aylangan terma jamoaga. Ushbu qarorga kelinishidan asosiy maqsad, futbolchilar o'zlarini biroz erkinroq his qilishlari edi. Talabalar turar joyi ancha keng va kerakli jihozlar bilan ta'minlangan.
Ushbu voqeaga Argentina FA vakili izoh berar ekan, jumladan, shunday deydi: "Biz aynan Universitet binosini tanlashimizning bir qancha sabablari bor. Avvalo, bu erda ham boshqa joylar kabi barcha sharoitlar mavjud. Qolaversa, futbolchilar ochiq havodan bahra olib, o'zi istagan ish bilan mashg'ul bo'la oladi. Biz bu erda o'z milliy taomimiz bo'lgan asado tayyorlash uchun hamma imkoniyatlarga egamiz. Bunday imkoniyat futbolchilarimiz uchun muhim. Chunki, bu (asado tayyorlash) madaniyatimizning bir qismi hisoblanadi. Rahbariyat futbolchilarni Qatarda bo'lib turgan vaqtida o'zlarini uyidagidek his qilishlarini xohlaydi. Milliy taomdan bahramand bo'lish esa, ularga ana shunday hissiyotni taqdim etadi deb o'ylaymiz".
Asado deb ataladigan janubiy amerikaliklar taomi butun dunyoga barbekyu nomi bilan mashhur. Argentinaliklar go'shtni yaxshilab pishirishadi. Keyin unga ko'p tuz qo'shib, salat barglari va vino bilan tanavvul qilishadi. Ushbu ishlar maxsus oshpaz tomonidan bajarilishi belgilangan. Ammo Messining o'zi bu ishlarda qatnashib, o'z jamoadoshlariga asado tayyorlab bergan.
Qatar universiteti argentinaliklar uchun eng zamonaviy jihozlarga ega trenajor zali, olimpiya o'yinlarida foydalaniladigan basseyn hajmiga teng bo'lgan cho'milish havzasi va 10 ming kishilik sig'imga ega stadionda mashq qilish imkonini taqdim etadi. 90 kishilik sig'im ega oliygoh yotoqxonasi Doha chetida joylashgan va mamlakatdagi eng nufuzli universitet tarkibiga kiradi.
Argentina terma jamoasi 2014 yilgi mundialda finalga qadar etib borgan edi. Ular bu safar missiyani to'liq bajarishga harakat qilib ko'rishadi. Ammo ko'pchilik mutaxassislar Messi jamoasini uzog'i bilan chorak finalga qadar bora olishadi deb hisoblamoqda. Eslatib o'tamiz, Jahon chempionatiga 20 noyabr kuni, Toshkent vaqti 21:00da, Qatar va Ekuador o'yini start beradi.
ISMATOV J.
Bosh sahifaga
265