Meksika bugun Argentinaga qarshi maydonga tushadi, saudlardan mag'lub bo'lgan Skaloni shogirdlariga bugun faqat va faqat g'alaba kerak. Messi jamoasi uchun bugungi uchrashuv oson bo'lmaydi, chunki raqib — Meksika. Qiyin guruhdan joy olgan "Mayya" yurti vakillari, birinchi turda Polsha terma jamoasiga qarshi og'ir bahs o'tkazishdi. Nursiz durrang bilan yakunlangan bahsda Meksikaliklar darvozaboni qahramonlik ko'rsatdi, Robert Levandovski ijro etgan 11 metrlik zarbani Gilerme Ochoa osonlik bilan qaytardi va jamoasi uchun qimmatli ochkoni qo'lga kiritidi. Qizig'i shundaki Ochoa uchun jahon chempionatlarida bunday perfomans odatiy hol. Lekin hayot shunday qizig'i shundaki, mundiallar qahramonining, klublarda xech "ketmoni uchmagan". Bugun biz uning faoliyatiga chuqurroq nazar solamiz.
"Amerika"dagi debyut va "Oltin to'p"ga davogarligi
1985 yil 13 iyul kuni Meksikaning Gvadalaxara shahrida tug'ilgan qahramonimiz, bolalik davridan futbol bilan shug'ullanadi va 17 yoshida Meksikaning "Amerika" klubida debyut qiladi. 2004 yildan boshlab "Amerika" klubining asosiy darvozaboni sifatida Meksika milliy chempionatida ishtirok etishni boshlaydi va o'sha vaqtlarda Meksika U20 jamoasiga jalb etila boshlaydi va keyinchalik jamoa sardoriga aylanadi. Bir yil o'tar o'tmas, 2005 yilda, Ochoa Meksika terma jamoasida debyut uchrashuvini Vengriyaga qarshi o'tkazadi va 2:0 hisobida yakunlangan uchrashuvda darvozasi dahlsizligini saqlab qoladi. SHu yilning o'zidayoq Ochoa professional faoliyatidagi birinchi sovrinini qo'lga qiritadi u "Amerika" bilan Klausura (Meksika jamoalari ishtirok etadigan mahalliy turnir) - 2005 g'olibiga aylanadi.
2007 yilda Kopa Amerikaning guruh bosqichidagi Braziliyaga qarshi o'yinda Gilerme millat qahramoniga aylanadi, uchrashuvda 8ta seyv amalga oshirgan darvozabon, yakunda Meksika 2:0 hisobida g'alaba qozonishiga katta hissa qo'shadi va turnir so'ngida Meksika bronza medali sohibiga aylanadi. Darvozabon yorqin o'yinlari evaziga mashhur simulyator o'yini FIFA 08 muqovasida ko'rinish beradi.
2008 yildagi "Oltin to'p" nominaciyasida Ochoa top-30dan joy oladi, natijalar elon qilinganda Ochoa davorgarlar orasida so'nggi 30chi o'rini egallaydi, bunday natija Meksika futboli uchun tarihiy voqealik bo'ladi chunki bundan avval hech qaysi meksikalik futbolchi "Oltin to'p" nominaciyasining davogarlar ro'yhatidan joy ololmagan.
Uzoq kutilgan Evropaga o'tish va doping mojaro
2008 yilgi qishki transferlar oynasida Ochoaga Evropaning "Arsenal", "Bavariya", "Manchester Yunayted" va "Atletiko Madrid" kabi grandlari qiziqish bildirgan lekin ish oxirigacha etib bormagan. Va Ochoa yana uch yil davomida "Amerika"da to'p tepgan.
2010 yildagi Janubiy Afrika mamlakatida bo'lib o'tgan mundialda Ochoa asosiy tarkibdagi o'rnidan mahrum bo'ldi, bunga Meksikalik mashhur sobiq darvozabon Antonio Karbaxalning tanqidlari sabab bo'ldi. Karbaxalning fikriga ko'ra Ochoa uzoqdan yo'llangan zarbalarni unchalik yaxshi qaytara olmas ekan. Meksikaning o'sha vaqtdagi bosh murrabiyi Xavier Aggire ham bu fikrga qo'shildi va "Krus Aral" jamoasi darvozaboni va Oskar Peresga ishonch bildirdi.
2011 yilda esa Ochoaning faoliyatidagi eng katta fojia sodir bo'ldi va uning top jamoaga o'tish maqsadlari barbod bo'ldi, bunga sabab esa — KONKAKAF turniridagi bahsdan so'ng topshirilgan doping test. Meksika terma jamoasining tarkibidagi 4ta o'yinchi doping testdan o'ta olmagan, futbolchilarning organizmida taqiqlangan klenbuterol (bu modda bronxial astma bilan kasallangan insonlarning dorisi tarkibida bo'ladi) moddasi topilgan. Ikki oydan so'ng nazorat kommisiyasi futbolchilarni doping qabul qilishmaganini isbotladi, aslida o'yinchilar turnir vaqti o'zlari bilmagan holda go'sht istemol qilishgan va keyinchalik futbolchilar oqlangan, lekin endi kech bo'lgandi. Top klublar va aynan PSJ Ochoaning transferidan voz kechgandi.
Doping mojarolariga qaramay, Ochoa 2011 yilda Franciyaning "Ayachcho" klubiga ko'chib o'tdi va 3 yillik shartnoma imzoladi. Uch mavsum davomida Ochoa ajoyib o'yinlar namoyish etdi va axborot manbalarining kuzatuvida edi. 2012/2013-yilgi mavsumda Ochoa PSJga qarshi uchrashuvida ajoyib o'yin namoyish etib, darvozasi dahlsizligini saqlab qoldi va jamoasiga bir ochko taqdim etdi. Bir mavsum o'tib esa yana o'sha PSJga qarshi uchrashuvda 17ta seyv amalga oshirdi (Liga 1 rekordi) va faqatgina 86-daqiqada darvozasidan gol o'tkazdi bu o'yin Ochoaning faoliyatidagi eng yorqin o'yinlaridan biri bo'ldi.
JCH-2014. Braziliyaga qarshi uchrashuv va 8ta seyv. Faoliyatining cho'qqisi
Jahon chempionatidagi Braziliyaga qarshi bahs oldidan jamoa murrabiyi Migel Errera vanihoyat, Ochoaga ishonch bildirdi va u umidni oqladi (ungacha Ochoa 2006 va 2010 yildagi Jahon chempionatlarid zahirida o'tirgan). Ochoa porlagan o'yinda 8ta seyv amalga oshirdi va fantastik o'yin namoyish etdi, Neymarning havodan bergan zarbasini qaytargan kiperning seyvi hali ham xammaning ko'z oldida.
"Hech qaysi darvozabon futbol tarixida Braziliyaga qarshi bunday o'namagan, Ochoa bugun qahramon bo'ldi" - deya takidlab o'tgan edi Ektor Errera.
"O'sha uchrashuv va turnirni har doim eslayman va har doim u o'yin men uchun eng yaxshisi bo'ladi, chunki men o'shanda mundialda debyut qilgandim" - deya o'sha uchrashuvni eslaydi Gilerme Ochoa.
"Malaga"dagi omadsizligi. Zahiradagi ikki yil
Ochoa uchun fantastik tarzda o'tgan JCH-2014 dan so'ng, darvozabon "Malaga" bilan uch yillik shartnoma imzoladi. O'sha vaqtlardagi "Malaga"da katta rejalar bor edi. Klubga egalik qilgan Qatarliq shayxlar Ochoaga ishonishdi, lekin aynan "Malaga" darvozabon faoliyatidagi eng katta omadsizlik bo'ldi. 2 yil davomida zaxirada o'tirgan darvozabon, 2016 yil 5 mart kuni La Ligada "Deportivo"ga qarshi uchrashuvda debyut qildi. Zaxirada qolib ketgan qahramonimiz o'yin amaliyoti uchun, 2017 yil yozda "Granada"ga ijara asosida ko'chib o'tdi va u erda bir mavsum o'ynadi. SHundan so'ng Ochoa Belgiyaning "Standard" jamoasi safiga borib qo'shildi va uch mavsum chiroyli o'yin namoyish etdi.
Rossiya maydonlarida esa Ochoa odatdagidek ishonchli o'yin ko'rsatdi va amaldagi chempion Germaniyaga gol urishga yo'l qo'ymadi. Guruhdan chiqqan meksikaliklar bu safar ham 1/8 finalda ishtiroklarini yakunlashdi.
2019 yilda esa Evropadan haridori chiqmagan Gilerme o'z vataniga, aniqrogi "Amerika"ga qaytdi va hozirgi kungacha Meksika chempionatida faoliyatini davom ettirmoqda.
"Men o'z faoliyatimni juda muvaffaqiyatli deb uylayman" - deya aytib o'tgan edi Gilerme mahalliy nashrlar bilan bo'lgan muloqotda. - "Hamma har xil fikrlaydi, ayniqsa bunday sinovlardan o'tmagan odamlar. Menga Evropadagi yillarim juda qimmatga tushgan, lekin o'ynagan jamoalarim muxlislari mendan minnatdor va meni hurmat qilishadi.
- Meksikalik darvozabonlar hali Evropada o'ynamagan, men birinchi bo'ldim. Maqsalarimga erishdim, dunyoning eng zo'r ligalarida, eng zo'r o'yinchilarga qarshi kurashdim va yaxshi o'yin namoyish etdim.
- Men baxtliman, 15 yoshimdan beri professional darajada o'ynayapman, 18 yoshimda terma jamoa libosini kiydim va 5ta mundialda qatnashdim. Bu baxt bo'lmay nima?" - deydi Ochoa.
Eslatib o'tamiz, bugun yarim tunda, Toshkent vaqti bilan 23:59 da Jahon chempionati 2-tur doirasida Argentina - Meksika uchrashuvi start oladi.
Abdulvosit Bektemirov tayyorladi
Bosh sahifaga
222