Ikkita turdan keyinoq pley-off yo'llanmasini naqd qilib qo'ygan Franciya terma jamoasi bugun bitta durangga ega, hali pley-offdan umidini uzmagan Tunisga qarshi o'yin o'tkazadi.
Amaldagi chempion Franciya avvaliga Avstraliyani, keyin esa Daniyani mag'lubiyatga uchratdi. Tunis esa Daniyaga qarshi ilk turda durang o'ynagandi. Ikkinchi turda esa Avstraliyadan mag'lubiyat qabul qilib olingan. Ammo hali imkoniyat yo'qotilmagan: buning uchun Franciya mag'lub etilishi, shuningdek Avstraliya - Daniya o'yinida durang qayd etilishi lozim.
Tunis hali JCH-2022da gol urmadi
Tunis terma jamoasini sermahsul deya olmaymiz. Ular o'yinlarda o'rtacha 1,3 tadan gol urishadi. Ushbu mundialda esa Jalel Kadri shogirdlari umuman gol ura olishmadi. Jamoa ortda qolgan ikkita o'yinda raqiblar darvozasi tomon umumiy hisobda 5 tagina aniq zarba berishgan. Ularni xavfli zarba deya olmaymiz ham.
Franciya yana g'alabaga o'ynaydimi?
Tunisga qarshi o'yin oldidan asosiy masala - Mbappe asosiy tarkibda tushadimi? Franciya 1/8 final masalasini hal qilib bo'lgan. Tunisga qarshi o'yin esa avvalgi uchrashuvlarda zaxirada qolgan futbolchilarni maydonda sinab olish uchun yaxshi imkoniyat bo'lishi mumkin.
Mbappe har ikki o'yinda ham to'liq harakat qilgandi. Ammo Desham g'alaba uchun o'ynashini va asosiy tarkibga imkon berish mumkinligigiga shama qilgan.
Taxminiy tarkib va taktika
Kadri katta ehtimol bilan Tunisni yana 3-4-2-1 sxemasi bo'yicha o'ynatishda davom etadi. U hujumkor jamoaga qarshi o'yin uchun yaxshi samara beradigan uslub. Diskvalifikaciya qilingan va jarohat olganlar yo'q. SHu sababli Tunis o'zining eng asosiy va optimal tarkibi bilan maydonga tushsa kerak.
Franciya esa 4-2-3-1 sxemasida harakat qilmoqda. Ammo jamoa pley-off masalasini hal qilganini inobatga olsak, tarkib avvalgilariga qaraganda o'zgarib ketishi ehtimoli yuqori.
Uchrashuv bugun soat 20:00da boshlanadi. O'yin "Sport TV" orqali jonli efirda namoyish etiladi.
championat.asia esa odatdagidek mazkur bahsni onlayn matnli translyaciya qiladi.
Aziz To'xtamurodov tayyorladi
Bosh sahifaga
199