Aslida jamoa sovrinli o'rinlar uchun kurashgandi. Aftidan, yangi mavsum oldidan jamoada o'zgarishlar amalga oshadigan ko'rinadi.
Jamoada to'p tepgan tajribali himoyachi Boburbek Yo'ldoshevning "Qizilqum"dagi faoliyatidan qanchalik ko'ngli to'ldi? Yangi mavsum oldidan jamoada qoladimi? SHular yuzasidan uning fikrlariga quloq tutdik.
- Superliga-2022 mavsumidan olgan taassurotlaringiz qanday?
- Mavsum aslida yomon bo'lgani yo'q. Hamma guvohi bo'ldi, oxirgi turlarga qadar o'tkinchi o'yinlar o'tkazilmadi. Aytaylik, chempionlik nomi ham so'nggi turga kelib aniqlandi. SHundan ham bilish mumkin, Superliganing yakunlangan mavsumi juda qiziqarli va murosasiz kechdi.
- Mavsum shaxsan o'zingiz uchun qanday xotiralar bilan yodda qoldi?
- Yomon emas. Lekin yaxshi ham emas. O'zim kutganchalik bo'lgani yo'q. Men bundan ko'prog'ini kutgandim.
- Jamoada qolasizmi?
- Hozircha bu borada biror narsa deya olmayman. SHartnomam 20 dekabr kuni yakunlanadi. Qolganini vaqt ko'rsatadi.
- "Qizilqum"ning maqsadi jiddiyligi uchun shu klubni tanlaganingiz haqida aytgandingiz. Ushbu jamoaga o'tishingiz siz uchun noto'g'ri qaror bo'lmadimi?
- Qaror qabul qilib bo'lingandi. Buni ortga qaytarishning iloji yo'q. "Qizilqum"da o'tkazgan mavsumimdan afsuslanmayman. O'ylashimcha, jamoa mavsumni yomon o'tkazgani yo'q. SHu sabab bundan ko'p tashvishga tushishga hojat yo'q.
- Superliganing boshqa jamoalaridan takliflar bormi?
- Albatta, takliflar bor.
- Sizni legioner sifatida ham ko'rib qolishimiz mumkinmi?
- Ha, albatta legioner sifatida faoliyatimni boshqa chempionatda davom ettirishim ham mumkin. Oldindan bir narsa deyish qiyin.
- JCH-2022da qaysi jamoalarga muxlislik qilyapsiz?
- Mazkur mundialda Braziliya va Angliya terma jamoalariga muxlislik qilyapman.
Bosh sahifaga
382