"Ko'hna shahar" jamoasi bunga qadar Abdujamol Isroilov, Qahramon Bahodirov, Alisher Sanoev kabi futbolchilarni qo'shib olgandi. Kuni kecha mahoratli va tajribali ijrochi Sanat SHixov ham jamoa safini to'ldirdi. Yarim himoyachining "So'g'diyona"dan ketishini ko'pchilik uchun kutilmagan qaror sifatida qabul qildi. Biz esa barchasiga oydinlik kiritish maqsadida Sanat SHixovga bir necha savollar bilan yuzlandik.
- Qishki o'quv-mashg'ulot yig'inini "So'g'diyona"da boshlagan edingiz. Lekin, kutilmaganda "Buxoro"ga o'tganingiz haqida xabar chiqdi. Taklifni qabul qilishingiz qanday bo'ldi?
- Barchasi tezda kutilmaganda ro'y berdi. "So'g'diyona" bilan yangi mavsumga tayyorgarlik ko'rayotgan edim. Ammo, ayrim sabablar tufayli ketishga qaror qildim. SHu pallada "Buxoro" jamoasidan taklif kelib tushdi. CHorlovni tezda qabul qildim. O'ylab o'tirishga vaqtim ham, xohishim ham bo'lmadi. Buxoro shahrini va muxlislarini yaxshi ko'raman. Azaldan yaxshi xotiralar qolgan. SHuning o'zi ham qaror qabul qilishda qiyinchilik tug'dirmadi deb o'ylayman.
- Qiziq jizzaxliklar safini tark etishingizga qaysi omillarni sabab sifatida ko'rsata olasiz?
- Sababi ularning o'yin uslubida o'zimni ko'rmadim. Ketish qarori o'zimdan chiqdi. "So'g'diyona"da ajoyib murabbiy va futbolchilar bor. Rahbariyat jamoaga qo'lidan kelgancha yaxshi sharoitlarni yaratib bermoqda. Kelgusida bu jamoaga omad tilayman. Superligada medallarga ega chiqib Jizzax shahri aholisini xursand qilishligini tilab qolaman.
- Mazkur jamoadagi bir yillik faoliyatingizdan qay darajada qoniqish hosil qildingiz?
- Barchasi shundan boshlandi. To'g'risi o'tgan mavsum ko'rsatgan o'yinim o'zimga yoqmadi. Bitta o'yin yaxshi harakat qilsam, keyingi uchrashuvda o'zim istagandek o'ynolmadim. Qisqasi o'yinimdan ko'nglim to'lmadi. Balki, murabbiyning taktikasiga tusha olmagandirman. "Surxon" bilan kechgan o'rtoqlik bahsidan so'ng jamoa bilan xayrlashdim. Bildimki, bu jamoada o'zim kutgan o'yinni ko'rsata olmayman. Jamoada qolib pulimni olib yurishim mumkin edi. Lekin, men bunday yo'l bilan pul topishni o'zimga lozim ko'rmayman. Futbolchi birinchi galda futboldan rohat olishi kerak. Har bir sohada inson sidqidildan halol mehnat qilib oila boqishi darkor. Menga yoshligimdan shunday tarbiya berishgan.
- Superligadan Pro liga jamoasiga o'tishingizni ko'pchilik ortga tashlangan qadam deyishi mumkin. Biroq, ushbu liga so'nggi yillarda yuqori darajaga chiqayotganligi uchun ham futbolchilar Pro liga klublariga o'tishmoqda desak bo'ladimi ?
- Ha, o'tgan yili musobaqani tashkil qilish yo'lida katta ishlar amalga oshirildi. Bu darajada tezda o'sishga erishgani bilan PFLni tabriklasa bo'ladi. Agarda shu zayilda davom etilsa bundan faqat o'zbek futboli yutadi. SHaxsan o'zim uchun "Buxoro" ortga tashlangan qadam emas. Meni taniganlar xarakterimni yaxshi biladi. Xudo xohlasa o'zimga bundan ham yuqori talablarni qo'yib ortga tashlangan qadam emasligini isbotlayman.
- Ushbu qaroringizga Ulug'bek Baqoevning munosabati qanday bo'ldi?
- Bilmadim. Bu borada gaplashganim yo'q. Men futbolchiman. Faoliyatim davomida ko'plab yaxshi murabbiylar bilan birga ishlaganman. Ammo, shu paytgacha birorta murabbiydan ketishimga munosabatini so'ramaganman. Men bo'lmasam joyimda boshqa futbolchini o'ynatadi.
- Jizzaxlik futbol ishqibozlariga aytadigan so'zlaringiz bo'lsa marhamat...
- Ortda qolgan yil barchamiz uchun qiyin bo'ldi. SHunga qaramasdan bizni qo'llab-quvvatlab turishdi. Birinchi navbatda barchalariga sog'lik tilayman. Ajoyib bir yil uchun rahmat aytaman.
Abdulaziz Iskandarov suhbatlashdi
Bosh sahifaga
509