Ikromov katta futbolga "Bunyodkor"da kirib keldi va bir necha yil shu klub sharafini munosib himoya qildi. Endilikda futbolchi uchun yangi davr boshlanmoqda. U faoliyatida ilk bor jamoasini o'zgartirdi. Xo'sh, namanganliklarning taklifi qachon bo'ldi? Bu uning o'sishi uchun foydami? SHu va boshqa savollar bilan Farruh Ikromovga yuzlandik.
Rasman: Farruh Ikromov – "Navbahor" futbolchisi!
- "Navbahor"ga o'tish jarayoni qanday yuz berdi? Muzokaralar mavsum yakunlangach boshlandimi yoki avvalroqmi?
- Mavsum yakunlanganidan so'ng "Navbahor" klubidan taklif bo'ldi. Klub bilan kelishgan holda shartnoma imzoladik. Yakunda "lochinlar" azosiga aylandim. Bor gap shu.
- Bu jamoa faoliyatingizda qanchalik o'sish uchun xizmat qiladi? "Navbahor" burilish yasaydigan klubmi?
- Avvalo o'sishga erishishim o'zimga bog'liq, deb o'ylayman. "Navbahor"da kuchli futbolchilar etarlicha. Ular bilan faqat oldinga qarab intilish va yanada qo'shib borish kerak. Qolganini esa vaqt ko'rsatadi.
- "Bunyodkor"dan kelib qo'shildingiz. Misol tariqasida sobiq jamoadoshingiz Nurillo To'xtasinov uchun o'tgan mavsum Namanganda omadsiz o'tdi. SHu faktorni hisobga olib, sizda ikkilanish bo'lmadimi?
- Savol bermasingizdan oldin buni o'ylamadim ham. "Navbahor"ga o'tayotganda hech qanday ishonchsizlik yoki ikkilanishlar yuzaga kelgani yo'q. Nurillo To'xtasinov yaxshi futbolchi. Yangi jamoasida faqat omad tilayman.
- Bilishimizga qaraganda oldingi yillarda sizda legionerga aylanish imkoniyati bor edi. Orada jarohat sabab bir yildan oshiq tanaffus qildingiz. Balki "Navbahor"ning xalqaro maydonda qatnashishi yana xorij eshiklarini ochar?
- Nima bo'lib o'tganiga qaramay hammasi yaxshilikka, deb o'ylayman. Har bir ishda qandaydir hikmat bor. Men hozir o'zimni ko'rsatib, jamoam uchun foyda keltirish niyatidaman. Agarda shu vazifani bajara olsam, keyingi maqsad xorijga yo'l olish bo'ladi.
- Oldingizda "Paxtakor" varianti ham turgandi. "Paxtakor" "Navbahor"dan farqli ravishda pley-off da emas, guruh bosqichida o'ynaydi. Bunga fikringiz qanday?
- "Paxtakor"dan taklif bor edi. Lekin "Navbahor" ko'proq o'zida ko'rishni xohladi. O'ylaymanki, jamoa bilan yuksak marralarni zabt etamiz.
- "Navbahor" muxlislari har bir o'yinda stadionda ajoyib muhit hosil qilishadi. Ularga qanday tarif berasiz?
- Aytganingizdek, ular maydonda yaratadigan atmosferaning o'zi tarif hisoblanadi.
Bosh sahifaga
241