Kaysedo "Brayton"dan ketishini tasdiqladi. Futbolchini "Arsenal" sotib olmoqchi

"Brayton" yarim himoyachisi Moyzes Kaysedo ushbu transfer oynasida klubni tark etishini tasdiqladi.

"Men janob Blum va "Brayton"ga APLga kelish imkoniyatini bergani uchun minnatdorlik bildiraman va ular uchun doim qo'limdan kelganini qilganimni his qilyapman. Men doim tabassum bilan va yurakdan futbol o'ynayman.

Men Ekvadorning Santa-Domingo shahrida kambag'al bo'lib o'sgan 10 nafar bolaning eng kichigiman. Doim Ekvador tarixidagi eng sovrindor futbolchi bo'lishni orzu qilganman. Men "Brayton"ga rekord darajadagi transfer narxini qo'lga kiritishda yordam bera olganimdan faxrlanaman, bu ularga uni qayta investiciya qilish va klubning muvaffaqiyatini davom ettirishda ko'mak beradi.

Muxlislar menga qalblaridan joy ajratishdi va ular ham hamisha qalbimda bo'lishadi, shuning uchun ular bu ajoyib imkoniyatdan nega foydalanmoqchi ekanligimni tushunishadi, deb umid qilaman", – deb yozdi Kaysedo ijtimoiy tarmoqda.

Avvalroq "Arsenal" 21 yoshli futbolchi uchun 60 million funt taklif qilgani haqida xabar berilgandi. Unga "CHelsi" ham davogarlik qilmoqda, ammo "chaykalar""ko'klar"ning 55 million funtlik taklifini rad etdi.

Ekvadorlik futbolchi joriy mavsum "Brayton" safida 21 ta o'yin o'tkazib, 1 ta gol urdi va 1 ta golli uzatmani amalga oshirdi. Uning klub bilan shartnomasi 2025 yilning yoziga qadar mo'ljallangan.