Bilasiz yurtimizdagi ob-havo sharoiti sabab hattoki tabiiy maydonga chiqmagan jamoalar ham bo'ldi. Antaliya bu borada ayni muddao. CHunki barcha sharoit bor, raqiblar aniq, maydonlar xuddi marjon donalaridek shahar bo'ylab terib qo'yilgan. Ayni paytda men istiqomat qilayotgan mehmonxonada "Andijon" jamoasi delegaciyasi ham yashamoqda. Murabbiylar, futbolchilar barchasi shu erda, ko'z oldimizda. SHu bois nisbatan bu jamoa haqida ko'proq malumot berishga harakat qilyapmiz. 1 fevral kuni saytimizning navbatdagi ijodiy guruhi etib keladi va boshqa jamoalar mashg'ulotlari, bazalariga sayohat qilinadi.
Aleksandr Xomyakov kechadan boshlab tartib-intizomga jiddiy amal qilishga chaqirdi. Hattoki mashg'ulotda yuzakilikka jim qarayotgani yo'q. Anatoliy Kurlaev, Nikolay SHevchenko, Artyom Petrosyan yaqindan yordam bermoqda. Nikolay SHevchenko 2007 yilgi Osiyo kubogida Rauf Inileevning murabbiylar shtabidan o'rin olgan. Andijon o'g'loni, deya tariflanadigan Qobil Olimjonov darvozabonlar bilan ishlayapti. Ushbu murabbiy o'z vaqtida O'zbekiston terma jamoasi libosida ham harakat qilganini aytib o'tish joiz. Qiziq fakt shuki, joriy yil jamoaning murabbiylar shtabida faoliyat olib boradigan 3ta murabbiy ham futbolchilik faoliyatida darvozabon poziciyasida harakat qilgan.
Aleksandr Xomyakov - "Dinamo Maxachkala", "Torpedo Voljskiy", "Spartak Nalchik" darvozalarini qo'riqlagan.
Artyom Petrosyan - "Semurg'", "Dinamo" (Samarqand), "Traktor" (Toshkent), "Nasaf"da to'p tepgan.
Qobil Olimjonov - "Andijon" sobiq darvozaboni
Tarkibdagi o'zgarishlar davom etadi. Superligada munosib qatnashishni maqsad qilgan jamoa tarkibiga 3 nafar legioner kelgani haqida aytgandik. Bugun "Lokomotiv" himoyachisi Dilshod Komilov, Tojikiston terma jamoasi sardori Ahtam Nazarov qo'shiladi. Himoyada kuchli raqobat yuzaga kelmoqda. Bu hali hammasi emas. Jamoa "Paxtakor"dan Diyor Xolmatovni olishga harakat qilmoqda. AGMK hujumchisi Mirjahon Mirahmadov ham qiziqishlar doirasida turibdi. Vaziyatga qarab yana yangi nomlar paydo bo'lsa hech gap emas. Qisqasi klub tarkibni kuchaytirish uchun jon-jahdi bilan harakat qilyapti. Aytmoqchi argentinalik futbolchi Santiyago Gordano ham "Andijon"da ko'rikda o'tishi ko'zda tutilgan.
Bu orada "burgutlar" o'z maydonlari tayyor bo'lguniga qadar qaysi maydondan foydalanib turishlari malum bo'lib ulgurdi. Farg'onaning "Istiqlol" stadioni jamoa uchun vaqtinchalik uy o'yinlarini o'tkazish vazifasini o'tab beradi.
Bosh sahifaga
229