"So'g'diyona" Serbiya klubi bilan durang qayd etdi
Serbiyaning "Jeleznichar" jamoasi raqib vazifasini o'tagan uchrashuvda tomonlar 1:1 hisobidagi durangga imzo chekdi. Jizzaxliklarning o'yindagi yagona goliga bosniyalik hujumchi Zenan Zaymovich mualliflik qildi. O'yindan so'ng u saytimizga kichik intervyu berdi.
- "Jeleznichar" bilan o'yin haqida...
- Birinchi o'yin hech qachon oson o'tmaydi. U rasmiy yoki o'rtoqlik bo'lsin start baribir qiyin bo'ladi. O'yindan-o'yinga barchasi joyiga tushib boradi, deb o'ylayman.
- "So'g'diyona"ga kelganingizga 2 haftadan oshdi. Moslashish jarayonidan o'tyapsizmi?
- Moslashish juda yaxshi ketyapti. Murabbiylar, futbolchilarning ko'magini his qilyapman. Ikkinchi qadam bu til o'rganish. Futbolda terminlar bir hil qo'llaniladi. Lekin o'zaro muloqotda baribir men o'ynayotgan mamlakat tilini biroz bilish kerak.
- Malumotlarga qaraganda sizda Belgiya, Bosniya va Gercogovina fuqaroligi bor. Aslida qaysi mamlakatda tug'ilgansiz?
- Belgiyada tug'ilganman. futbolchilik faoliyatimni esa "Antverpen" yoshlar jamoasida boshlaganman. SHu vaqtgacha professional faoliyatim davomida Xorvatiya, Bosniya va Gercogovinada to'p tepganman. O'zbekiston men uchun yangi sarguzashtlar, o'zimni boshqa chempionatda sinab ko'rish imkoniyati.
- "So'g'diyona"ga qanday kelib qoldingiz?
- Klubdagilar taklif bilan chiqdi, xohish-istaklarim bilan qiziqdi. Rozi bo'ldim. Hujumkor o'yin ko'rsatamiz. Oldingi chiziqda ko'p vaziyatlar yaratamiz. Bu hujumchi uchun juda yaxshi.
- O'zbekistonda o'ynagan 3 nafar hamyurtlaringizni sanab beringchi?
- Samir Bekrich ("Bunyodkor"), Kerim Palich ("Metallurg"), Darko Markovich ("Paxtakor") ligangiz haqida malum bir malumotlarni aytishdi.
- Hujumchidan tabiiyki birinchi navbatda gol kutiladi. Legioner bo'lsa bu bosim ikki hissa ortadi. 2023 yilda nechta gol urishni maqsad qilgansiz?
- Gollar soni borasida oldindan bashorat qilishni yoqtirmayman. Ammo o'yindan zavq olib harakat qilsangiz golni o'zi keladi.
Bosh sahifaga
179